Жедел-іздестіру іс-шараларының нәтижесінде есірткі заттарын аса ірі мөлшерде сақтады деген күдікпен Шу ауданының 37 жастағы тұрғыны ұсталды.
Жамбылдық полицейлер күдіктінің тұрғылықты жерін тінту кезінде сарайда тұрған кір жуғыш машинаның ішінен 4 полипропилен қапшықтағы өсімдік тектес зат пен ерекше иісті ұнтақ заты бар пакет және ұнтақтауға арналған елек тауып, тәркіледі.
Сараптама қорытындысы бойынша аталған заттар жалпы салмағы 111 келі 500 гр «кептірілген марихуана» және жалпы салмағы 2 келі 960 гр «гашиш» есірткісі болып шықты.
Сондай-ақ, жазғы ас үйдегі диванның астынан 12 мм калибрлі «ТОЗ-63» маркалы тіркелмеген қос ұңғылы тегіс ұңғылы аңшы мылтығы табылды.
— Аталған дерек бойынша ҚР ҚК 296-бабының 4-бөлігімен сотқа дейінгі тергеу амалдары басталды. Күдікті өз кінәсін толық мойындады. Қазіргі уақытта ол Шу ауданы полиция бөлімінің уақытша ұстау изоляторына қамаққа алынды, — деп атап өтті ПД Есірткі қылмысына қарсы іс-қимыл басқармасының бастығы полиция полковнигі Әлім Бажықбаев.
