Жастар – қашанда қоғамның қозғаушы күші. Болашағын бағамдайтын мемлекет жастарының санасының ояу, білімінің жоғары болуына басты мән береді. Білім мен ғылымның салтанат құруы Отанның еңсесін ешкімге бастырмауға сеп болатынын бүгінгі заман дәлелдеп отыр.
Жастардың қоғамда жайлы орта құруы мақсатында Шымкент қаласының ішкі саясат және жастар істері жөніндегі басқармасының мемлекеттік жастар саясатын жүзеге асыру бағыты бойынша Алқа отырысы өтті. Қала әкімінің орынбасары Сәрсен Құранбек мемлекеттік жастар саясатын жүзеге асыруда басым бағыттарды атап берді. Жиынға қала жастары, жоғары және орта арнаулы оқу орындарының шәкірттері қатысты. Алдымен қалалық ішкі саясат және жастар істері жөніндегі басқарма басшысының міндетін уақытша атқарушы Мөлдір Кеуенова қалада жастар ресурстық орталықтары 12 бағыт бойынша іс-шаралар атқарып жатқанын атап өтіп, жыл басынан бері жүзеге асқан жұмыстарды баяндады. Басқарманың мәліметінше, бүгінде қалада 390 мыңға жуық жас бар.
Алқа мәжілісінде қалада жастар саясатын жүзеге асырудағы бірқатар мәселелер талқыға түсті. Атап айтқанда лудомания, есірткі қылмысының алдын алу, жастар денсаулығын қорғау және басқа бағыттарда мәселелер қозғалып, ұсыныстар айтылды. -Жастар — ұлттың болашағы. Сондықтан жастар тәрбиесі салғырттықты кешірмейді. Азаматтардың денсаулығын қорғауда жастар ресурстық орталығы, денсаулық сақтау басқармасы кешенді жұмыстарды қолға алу керек. Профилактикалық, скринингтік тексеру бойынша ақпараттандыру жұмыстарын күшейту қажет. Қазіргі таңда суицид мәселесі де алаңдатып отыр. Бұл — өте күрделі мәселе. Жастармен ақылдаса отырып, алда ақпараттық-насихаттық жұмыстарды жандандыру бойынша телеграм және ютуб канал ашуды да ойластырып көреміз, — деді Сәрсен Абайұлы. Жарыссөзге шыққан “Студенттік емхана” ЖШС дәрігері Тимур Байдуллаев жастарға МӘМС туралы көбірек насихат жүргізудің маңызды екенін алға тартып, жастарға өз денсаулықтарына немқұрайлы қарамауға шақырды. Сондай-ақ, жиында қоғамдық ұйым өкілдері тарапынан бірқатар ұсыныстар айтылды. Кездесуде Шымкент қаласындағы жастар саясатының жүзеге асырылуындағы 2023 жылдың қорытындысы және 2024 жылғы I-ші тоқсанында атқарылған жұмыстарының есебі және жастарға қатысты мәселелер талқыланды.
Жастардың қай замандарда болмасын, әрқашан қоғамда үлкен әлеуметтік күшке ие болғанын байқаймыз. Олар әрдайым қоғамның ең белсенді мүшесі әрі жұмыс күші болып табылған. Оның үстіне бүгінгі жастың ертеңгі елдің тұтқасын ұстайтын басшы боларын ескерсек, олардың қоғам үшін маңызы арта түседі.
