Түркістан облысында балық шаруашылығын дамыту бағытында жүйелі жұмыстар атқарылуда. Осы орайда Келес ауданында балық шаруашылығы өркендеп келеді. Ауданның су ресурстары мен табиғи жағдайлары бұл сала үшін қолайлы болып табылады, сондықтан жергілікті билік балық өсіруді кеңейтуге ерекше көңіл бөлуде.Мемлекеттік бағдарламалар мен қолдау тетіктері аясында бұл салада бірқатар жобалар жүзеге асырылып, жаңа жұмыс орындары құрылуда және ауылдық жерлерде әлеуметтік-экономикалық тұрақтылық нығая түсуде.
Аталған бағыттағы жобалардың бірі – «БозСу Балық Шаруашылығы» жеке кәсіпкерлігі. Кәсіпкер Олжас Әбдіжаппарұлы басшылық ететін бұл жоба 4,8 гектар жер телімінде жүзеге асырылуда. Былтыр кәсіпкерлік нысаны 1 миллион амур шабағын су айдынына жіберіп, нәтижесінде 4 тонна балық өнімі алынды.
Биыл шабақ саны 3 миллионға дейін ұлғайып, олардың 600 мың данасы сатылымға шығарылды. Қалған шабақтардан қосымша 10 тонна балық өнімі алу жоспарланып отыр. Сонымен қатар, инкубаторлық цех іске қосылып, алғашқы кезеңде 20 келі уылдырық өндірілді.
Келесі жылы бұл көлемді 100 келіге дейін ұлғайту жоспарлануда. Кәсіпорында қазіргі таңда 5 адам тұрақты жұмыспен қамтылып, қауіпсіз еңбек жағдайымен және тұрақты жалақымен қамтамасыз етілген.
Ірі жобалардың қатарында «Көшім» шаруа қожалығы да бар. Жалпы аумағы 76,2 гектарды құрайтын шаруашылықты Райс Көшімұлы басқарады. Мұнда балық өсірумен қатар, балық өңдеу цехын ұйымдастыру жұмыстарын жүргізуде. Қожалық жылына 32 тонна балық өндіріп, 15 адамды тұрақты жұмыспен қамтып отыр.
Ауданда балық шаруашылығымен қатар, өндірістік бағыттағы жобалар да қолға алынған. Соның бірі – «Керуен» өндірістік цехы. Гүлсім Абдурахманова жетекшілік ететін бұл жоба үй-тұрмыстық химия өнімдерін шығару бағытында жұмыс істейді. Бүгінгі таңда кәсіпорын жылына 700-800 тонна өнім шығарады. Цехта 15 адам жұмыспен қамтылған.
Жалпы Келес ауданында мемлекеттік бағдарламалар аясында іске асырылып жатқан бұл жобалар ауылдық жерлердегі кәсіпкерлік белсенділікті арттыруға, экономиканың әртараптандырылуына және тұрғындардың әл-ауқатын жақсартуға ықпал етуде.
Келес ауданында балық шаруашылығын дамыту – өңір экономикасын әртараптандырудың тиімді жолдарының бірі. Бұл салада атқарылып жатқан жүйелі жұмыстар мен қолдаулар өз нәтижесін беріп келеді. Жаңа өндіріс орындарының ашылуы, инфрақұрылымның жақсаруы және инвестиция тартудың артуы – ауданның агроөнеркәсіп кешенінде оң серпін қалыптастырып отыр. Алдағы жылдары да балық шаруашылығын кеңейту бағытында жұмыстар жалғасын табады деп күтілуде. Бұл өз кезегінде ауыл тұрғындарының әлеуметтік жағдайын жақсартып, өңірдің азық-түлік қауіпсіздігіне қосымша үлес қоспақ.
