Түркістан облысы күл-қоқыстан таза болуы тиіс. Себебі, тұрғындар таза ауамен тыныстап, оларға қолайлы жағдай жасалуы керек. Осылай деген облыс әкімі Өмірзақ Шөкеевтің тапсырмасынан кейін Түркістан облысында 200-ге жуық ауылдық округте жаппай тексеру жүргізілді.
Мониторинг нәтижесінде 540 бейберекет күл-қоқыс орындары анықталды. Ескертуден кейін 300-ден астам қоқыс орындары тазаланған. Қалғаны қаз қалпында. Бұл туралы бүгін Түркістан облысының әкімі Өмірзақ Шөкеевтің төрағалығымен өткен апталық аппарат мәжілісінде баяндалды. Облыс басшысы барлық аудан, қала әкімдеріне бір апта уақыт берді. Жеті күннің ішінде тапсырманы орындамағандарға шара қолданылады.
Түркістан облысы аумағында 1,5 мыңнан астам көппәтерлі тұрғын үй бар. Басым бөлігінде тұрғын үйге басқару органдары құрылды. Сонымен бірге аудан, қалалардағы 30 пәтерден асатын 300-ден астам тұрғын үйге мүлік иелерінің бірлестіктерін құру қажет. Бұл бойынша жол картасы әзірленіп, аудан, қала әкімдеріне тапсырма берілген.
Тексеру қорытындысы бойынша ауылдық округтерде орналасқан полигондардың арасында талапқа сәйкес келмейтіндері де анықталған. Мәселеге қатысты жауапты сала басшылары тапсырма алды. Жиналыста облыс бюджетінің атқарылуы мен облыстағы мүлік иелері бірлестігінің мәселелелері туралы соңғы мәліметтер ортаға салынды.
Ntime.kz
