Шымкент қаласының Қаратау ауданында тазалық мәселесіне ерекше назар аударылып келеді. Себебі қала тазалығы – тек қана санитарлық талап қана емес, сонымен қатар тұрғындардың мәдени деңгейін көрсететін басты өлшемдердің бірі. «Таза қала – мәдениетті қоғамның айнасы» деген түсінік бүгінде аудан халқының өмірлік ұстанымына айналып отыр.
Аудан тұрғындарының айтуынша, тазалықты сақтау ең алдымен әр адамның өз үйінің алдынан басталады. Жергілікті тұрғындардың бірі Гүлмира Әбдіқадырқызы: «Қаратау ауданында соңғы жылдары көшелердің абаттандырылуы мен қоқыс шығарудың жүйелі жолға қойылғанын көріп жүрміз. Бірақ бастысы – әрбіріміз қоқысты арнайы орынға тастауға дағдылансақ, ауданымыз одан да көркейе түсер еді», – дейді.
Ал жас тұрғындардың пікірі бойынша, тазалық тек коммуналдық қызметтің жұмысы емес, барлығымыздың ортақ міндетіміз. «Қалада сенбіліктер жиі ұйымдастырылады. Біз, жастар, соған белсене қатысуға тырысамыз. Себебі тазалықты сақтау – болашақ ұрпаққа үлгі», – дейді студент Нұрсұлтан Әлімұлы.
Қаратау ауданы әкімдігі коммуналдық қызметпен бірлесіп, көшелерді сыпыру, арық-атыздарды тазалау, қоқыс алаңдарын реттеу жұмыстарын тұрақты жүргізуде. Сонымен бірге тұрғындардың қатысуымен сенбіліктер өткізіліп, көпшілікке экологиялық мәдениет жөнінде түсіндірме жұмыстары жүргізіледі.
Әкімдік өкілдерінің айтуынша, тұрғындардың белсенділігі артқан сайын аудан тазалығы да жақсарып келеді. Тазалық пен тәртіпке бейжай қарамау – әрбір азаматтың борышы. «Қаратау – таза аудан» бастамасы бүгінде халық арасында қолдау тауып, қоғамдық мәдениеттің артуына ықпал етуде.
Қорытындылай келе, таза қала – тек әкімдік пен коммуналдық мекемелердің еңбегі емес, әрбір тұрғынның күнделікті мәдениетінің көрінісі. Қаратау ауданының тұрғындары осы ұстанымды берік ұстанып, туған қаланың көркеюіне өз үлестерін қосып келеді.
