Бүгінгі таңда карантин талаптарын бұзып, той жасаушылар саны күннен-күнге өсуде деп хабарлайды ТО ПД-ның баспасөз қызметі . Осы тұста Түркістан облысының бас мемлекеттік санитариялық дәрігерінің қаулысында көрсетілген карантин талаптарын бұзған Ордабасы ауданының тұрғыны анықталды. Ордабасылық полицейлердің тұрақты түрде жүргізіп жатқан рейдтік жұмыстарының барысында күндізгі сағат 14:30 шамасында өзінің үйінде «Құдалық» тойын жасап жатқан тұрғынды анықтады. Аталған тойға 50-ден астам туыстары жиналған. Сонымен қатар екінші бір тұрғын өзінің үйінде келін түсіріп, 40-тан астам тұрғынға «Беташар» тойын жасаған. Аталған жайттарға байланысты полиция қызметкерлері ҚР ӘҚБтК-нің 425-бабы «Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу» бойынша іс-құжаттарды жинақтап, тиісті мекемеге жолдады. Өз кезегінде Түркістан облысының полицейлері барлық азаматтарға карантин кезінде сақтық шараларды ұстанып, адамдар көп шоғырланған жерлерге бармауды, басқосулар мен той-жиындарды жасамауды ескертеді. Карантин ескерілмей, құқық бұзушылыққа жол берілген жағдайда, заң аясында жауапкершілік қарастырылған. Сондықтан немқұрайдылық танытпай, өз саулықтарыңыз үшін карантин талаптарын ұстанғандарыңыз жөн.
Түркістан облысында кезекті той жасаған тұрғындар анықталды
