Түркістан қаласының Әкімшілік-іскерлік орталығында көлік инфрақұрылымын дамыту жұмыстары қарқынды жүріп жатыр. Облыс әкімінің және салаға жауапты басшылардың бақылауымен 30, 32, 36 көшелеріне жол салу жұмыстары жүзеге асырылуда. Бұл жобалардың мақсаты – көлік қатынасының сапасын арттыру және тұрғындардың өмір сүру деңгейін жақсарту.
Облыс әкімінің бірінші орынбасары Зұлпыхар Жолдасов мердігер ұйымдармен кездесіп, құрылыс нысандарының барысымен танысып, сапа мен мерзімдер бойынша нақты тапсырмалар берді. «Каратас Майнинг» ЖШС 30-көшенің асфальт жабындысын төсеп, көгалдандыру жұмыстарына да кірісіп кетті. 32-көшеде негізгі қабат төселіп, көгалдандыру жұмыстары жақын арада басталмақ. Ал «Bazis Construction» ЖШС 36-көшенің құрылысын жүргізуде, бұл көшеде де асфальт жабындысын салу жұмыстары қолға алынған.
Осы жобалардың аяқталуы, Б.Саттарханов көшесі мен 9, 11 көшелеріндегі көлік кептелістерін азайтып, Түркістан халықаралық әуежайымен тікелей байланыстыратын жолдарды жетілдіруге мүмкіндік береді. Нысанның құрылыс жұмыстары 2025 жылға дейін жалғасады, ал әкімшілік-іскерлік орталықта көлік ағынының тиімділігін қамтамасыз ету үшін барлық қажетті шаралар қабылдануда.
Облыс әкімінің бірінші орынбасары жауапты басшыларға жол құрылыс жұмыстарын тұрақты қадағалауды, жол сапасын тексеретін мекемелермен «Жаңа қала» мөлтек ауданындағы жаңа жолдардың жай-күйін тексеруді тапсырды. Бұл жұмыстардың барысы тұрақты мониторингке алынып, тұрғындардың құқықтарын қорғау және сапалы жол инфрақұрылымын қамтамасыз ету мақсатында атқарылуда.
Жалпы, Түркістан қаласындағы көлік инфрақұрылымын дамыту жұмыстары жергілікті тұрғындардың өмір сапасын арттырып, көлік қатынасын жақсартуға үлес қосады. Облыс әкімдігі мен құрылыс ұйымдары тұрғындардың қажеттіліктерін ескере отырып, инфрақұрылымды жақсартуға бағытталған жұмыстарды атқаруда, бұл Түркістанның әлеуметтік-экономикалық дамуына оң әсер етеді.
