Түркістан қаласының әкімі Әзімбек Пазылбекұлының төрағалығымен өткен аппараттық мәжілісте қаладағы қоғамдық және мәдени салалардың даму барысы қаралды. Мәжіліске қала әкімінің орынбасары Мекенхан Қырықбаев жетекшілік ететін түрлі салалар бойынша атқарылған жұмыстар туралы есептер тыңдалды.
Ең алдымен, ішкі саясат бөлімінің есебі тыңдалды. Баяндамашы – бөлім басшысы Жеңісәлі Төлепбергенов қазіргі уақытта қалада 14-35 жас аралығындағы жастар санының 71 486 адамды құрағанын атап өтті. Оның ішінде 19 мыңға жуығы студенттер, 34 556-сы мектеп оқушылары. Бұл жас буынның үлкен әлеуметтік потенциалын ескере отырып, әкімдіктің жастар саясатын іске асыру мәселелеріне ерекше көңіл бөлініп отыр. Жеңісәлі Төлепбергеновтің айтуынша, қазіргі таңда жастардың қоғамдық өмірге қатысуы, олардың еңбекке қабілеттілігін арттыру мақсатында көптеген бағдарламалар жүзеге асуда.
Қала әкімі Әзімбек Пазылбекұлы өз кезегінде жастардың әлеуетін тиімді пайдаланудың маңыздылығын атап өтті. Ол жастарды жұмыспен қамту, оқыту, кәсіпкерлік дағдыларын дамыту мәселелерін одан әрі жетілдіру қажеттігін айтты. Сондай-ақ, әкім жастар арасындағы қылмыстық құқық бұзушылықтардың алдын алу шараларын күшейту, әлеуметтік мәселелерді шешуге бағытталған жұмыстарды жандандыруды тапсырды.
Екінші мәселе бойынша мәдениет бөлімі атқарған жұмыстар туралы есеп берілді. Бұл мәжілісте, әсіресе, қаланың мәдени саласындағы маңызды бағыттардың бірі – ономастика мәселесіне назар аударылды. Әкім қалада жаңа атаулар мен көше атауларының тарихи, мәдени мәні мен мағынасын ескеріп, оларды қайта қарау керектігін жеткізді. Сонымен қатар, қала әкімі мәдени шаралардың сапасы мен ауқымын арттыру, сондай-ақ мәдени іс-шараларды тұрғындарға кеңінен насихаттау бойынша нақты тапсырмалар берді.
Қала әкімдігіның мәдениет және ақпарат бөлімінің өкілдері осы тапсырмаларды жүзеге асыру үшін ауқымды жұмыстарды қолға алып, қалалық мәдени шараларды ұйымдастыруда ақпараттық қолдауды күшейтуді жоспарлап отыр. Әкім мәдени іс-шаралар алдында ақпараттық түсіндіру жұмыстарын жүргізу, тұрғындардың мәдени шараларға қатысу белсенділігін арттыру бағытында жүйелі жұмыстар жүргізу қажеттігін атап өтті.
Сонымен қатар, мәжіліс барысында этнос өкілдерінің және үкіметтік емес ұйымдардың қызметі, олардың қала өміріне қосатын үлесі туралы да сөз қозғалды. Қала әкімі еліміздегі түрлі этникалық топтардың және үкіметтік емес ұйымдардың бірлігі мен өзара үйлесімділігін дамыту мәселелеріне терең көңіл бөлу керектігін ескертті. Түрлі этнос өкілдерінің мәдениетіне құрметпен қарап, олардың қоғамдағы рөлін арттыру мақсатында көп ұлтты қаланың әлеуетін толық пайдалану қажет екенін атап өтті.
Түркістан қаласының әкімі Әзімбек Пазылбекұлы мемлекеттік саясаттың барлық саласында әлеуметтік тұрақтылықты нығайту, мәдениет пен білім беру бағытындағы жұмыстарды жандандыру, сондай-ақ жастардың қоғамдағы белсенділігін арттыру арқылы қала тұрғындарының өмір сапасын жақсартуды мақсат етіп отыр. Жиынның соңында барлық бөлім басшыларына берілген тапсырмаларды орындау бойынша жұмыс жоспары белгіленіп, алдағы уақытқа нақты міндеттер қойылды.
