Қала көшелерін жарықтандыру – заманауи қалалық инфрақұрылымның ажырамас бөлігі. Тиімді ұйымдастырылған жарық жүйесі тұрғындардың қауіпсіздігін қамтамасыз етіп қана қоймай, қала келбетін көркейтіп, әлеуметтік және экономикалық өмірдің дамуына оң әсер етеді.
Ең алдымен, көше жарығы жол-көлік оқиғаларының алдын алуда маңызды рөл атқарады. Түнгі уақытта жолдың, жаяу жүргіншілер өткелдерінің және жол белгілерінің анық көрінуі жүргізушілер мен жаяу жүргіншілер үшін қауіпсіз жағдай туғызады. Сонымен қатар, жарықтандырылған көшелер қылмыс деңгейін төмендетуге ықпал етеді, себебі жарық – қоғамдық тәртіпті сақтаудың тиімді құралдарының бірі.
Түркістан қаласында тұрғындардың қауіпсіздігін қамтамасыз ету және қолайлы орта қалыптастыру мақсатында көше жарықтандыру жүйесін жетілдіру жұмыстары тұрақты түрде атқарылып келеді.
Қазіргі таңда қала аумағында 37 302 жарықтандыру нүктесі жұмыс істейді. Оның ішінде, ішкі орам көшелеріне 450 дана шам орнатылған. Барлық шамдар заманауи, энергия үнемдейтін технологиялармен жабдықталған.
Сонымен қатар қазіргі уақытта 30 көшеде жаңа электр шамдарын орнату және жарықтандыру желісін орнату жұмыстары қарқынды түрде жүріп жатыр.
Жарықтандыру желісі автоматтандырылған жүйе арқылы басқарылады. Көшелердегі шамдар кешкі 17:00-да қосылып, таңғы 07:00-де өшіріледі. Бұл қала тұрғындарының түнгі уақытта қауіпсіз қозғалуына, қоғамдық тәртіптің сақталуына және қала келбетінің жақсаруына оң әсер етеді.
Алдағы уақытта қаланың инженерлік инфрақұрылымын жаңарту аясында жарықтандыру желілерін кезең-кезеңімен жаңғырту, қосымша нүктелер орнату жұмыстары жалғасын табады. Сонымен бірге тозығы жеткен электр бағаналарын ауыстыру шаралары да қолға алынған.
Қорытындылай келе, қала көшелерін жарықтандыру жұмыстары – тұрғындардың өмір сапасын арттыруға бағытталған маңызды шара. Дұрыс жоспарланған және заманауи технологиялармен жабдықталған жарықтандыру жүйесі қауіпсіз, жайлы әрі көрікті қала қалыптастырудың негізі болып табылады.
