Шымкент қаласының қарқынды дамып келе жатқан аумақтарының бірі – Қаратау ауданы. Мұнда соңғы жылдары тұрғындардың өмір сүру сапасын арттыруға бағытталған инфрақұрылымдық және абаттандыру жұмыстары жүйелі түрде жүзеге асуда. Ауданның әрбір көшесін көркейту, тұрғындарға қолайлы жағдай жасау – әкімдік қызметінің негізгі басымдықтарының бірі.
Бүгінде Қаратау ауданында бірқатар көшелерде асфальт төсеу, жиектастарды орнату және жаяу жүргіншілер жолын қалыптастыру жұмыстары жүргізілуде. Мәселен, Тұран шағынауданындағы басты көшелерде және Нұрсат, Нұртас, Тассай тұрғын алаптарында жол төсемдері жаңартылып, көлік қозғалысы үшін қолайлы жағдай жасалуда. Сонымен қатар, ауданның шет аймақтарындағы шағын көшелерге де ерекше назар аударылып отыр. Бұл жұмыстардың нәтижесінде тұрғындар қоғамдық көліктердің кедергісіз қатынауына және жеке көліктерімен еркін жүруіне мүмкіндік алмақ.
Абаттандыру іс-шаралары тек жолдарды жөндеумен шектелмейді. Қала тұрғындарының қауіпсіздігі үшін жаяу жүргіншілерге арналған жолақтар сызылып, мектеп пен балабақша маңына арнайы белгілер қойылуда. Кешкі және түнгі уақытта қауіпсіздікті қамтамасыз ету үшін көшелерге заманауи жарық шамдары орнатылып жатыр. Мұндай шаралар балалардың мектепке баруы мен қайтуын жеңілдетіп қана қоймай, тұрғындардың тәуліктің кез келген уақытында еркін қозғалуына мүмкіндік береді.
Сонымен бірге, көгалдандыру жұмыстары да кең көлемде атқарылуда. Жыл басынан бері аудан көшелерінің бойына жүздеген ағаш көшеттері мен сәндік бұталар отырғызылды. Әсіресе орталық көшелерде гүлзарлар жасақталып, тұрғындар демалатын шағын алаңшалар абаттандырылды. Бұл бастамалар Қаратау ауданының экологиялық ахуалын жақсартып, эстетикалық келбетін айшықтай түсуде.
Тұрғындар да атқарылып жатқан жұмыстарға оң бағасын беруде. Нұрсат шағынауданының тұрғыны Гүлмира Әбдірайымқызы: «Біздің аулаға жақын көшелерде жарық шамдары орнатылып, тротуарлар салынды. Бұрын балалар кешке ойнауға қорқатын еді, қазір қауіпсіз әрі жарық. Осындай жұмыстар жалғасын таба берсе, ауданымыз одан әрі көркейе түседі» – деп ризашылығын білдірді.
Аудан әкімдігі тарапынан барлық жұмыстардың сапасы қатаң бақылауда. Әкім Алмас Абаев мердігер мекемелерге жұмысты белгіленген мерзімде әрі сапалы орындау міндеттелетінін атап өтті. Жыл соңына дейін тағы бірнеше көшеде абаттандыру жұмыстары толық аяқталып, пайдалануға беріледі деп жоспарлануда.
Қаратау ауданындағы абаттандыру жұмыстары – Шымкент қаласын көркейтуге бағытталған кешенді бағдарламаның бір бөлігі. Инфрақұрылымды жүйелі дамыту арқылы тұрғындарға қолайлы орта қалыптастыру – басты мақсат. Әкімдік өкілдері алдағы уақытта да бұл бағыттағы жұмыстар жалғасын табатынын жеткізді.
