Экология департаменті 2025 жылдың шілде айында «Қазақстан Ғарыш Сапары» ұлттық компаниясымен бірлесіп ғарыштық мониторинг жүргізді. 8–14 шілде аралығында түсірілім нәтижесінде қала аумағынан 46 рұқсатсыз қоқыс үйіндісі анықталды. Оның ішінде ең көбі Қаратау ауданынан табылған – 26 орын. Бұл дерек аудан аумағында бейберекет қоқыс тастау мәселесінің әлі де өзекті екенін көрсетті.
Қалған қоқыс орындарының аудандық бөлінісі: Тұранда – 6, Еңбекшіде – 6, Абайда – 5, Әл-Фарабиде – 3. Қаратау ауданы көш бастап тұрғандықтан, мұнда тазалық мәдениетін қалыптастыру және тұрғындардың экологиялық жауапкершілігін арттыру бағытындағы жұмыстарды күшейту қажет.
Жергілікті әкімдіктерге хат жолданып, кейбір аумақтарда тазарту жұмыстары жүргізілгені белгілі болды. Дегенмен, барлық орындар толық жойылған жоқ, ал қалған учаскелер бойынша зерделеу жұмыстары жалғасуда. Ғарыштық түсірілім арқылы заңсыз қоқыс орындарын анықтау – экологиялық бақылаудың тиімді тетігіне айналып отыр. Бұл әдіс арқылы қоқыс орындарын жасырын тастау әрекеттерінің алдын алуға болады.
Сарапшылардың пікірінше, мәселенің басты шешімі – әр тұрғынның жауапкершілікті сезінуінде. Егер адамдар өз тұрмыс қалдықтарын уақытылы шығарып, белгіленген орындарға тастаса, заңсыз қоқыс саны едәуір азаяды. Қаратау ауданында экологиялық мәдениетті арттыруға бағытталған үгіт-насихат жұмыстары мен сенбіліктерді жиі өткізу – мәселенің түпкілікті шешіміне ықпал етеді. Сонымен қатар, мектептер мен колледждерде экологиялық сабақтар өткізу, тұрғындарды ақпараттандыру арқылы да экологиялық жауапкершілік қалыптасады.
Қаратау ауданында бұл бағыттағы жұмыстар тұрақты түрде жалғасуы тиіс. Тазалық пен тәртіпті сақтау тек билік органдарының ғана емес, әрбір тұрғынның ортақ міндеті екені ұмытылмауы керек. Қоғам болып бірігіп әрекет еткенде ғана заңсыз қоқыс үйінділерін азайтып, ауданның экологиялық жағдайын жақсартуға қол жеткізуге болады.
