Бүгін IV шақырылымдағы Шымкент қаласы қоғамдық кеңесінің бірінші отырысы өтті. Отырысты Шымкент қаласы қоғамдық кеңесін қалыптастыру жөніндегі жұмыс тобының жетекшісі ретінде ашып, жүргізіп отырдым.
Жиынға Шымкент қаласы мәслихатының төрағасы Нарымбетов Бахадыр Мәдәліұлы қатысып, қоғамдық кеңестің жаңа мүшелерінің алдағы жұмыстарына сәттілік тілеп, кеңес куәлігін және төсбелгісін табыстады.
Шымкент қаласы қоғамдық кеңесінің IIІ шақырылымының төрағасы ретіндегі өкілеттілігім 2025 жылдың 30 наурыз күні аяқталды. 3 жылда Қоғамдық кеңестің ІІІ шақырылымының мүшелері айтарлықтай үлкен жұмыстар атқарды. Оны өзімнің соңғы берген брифингімде айтып өткенмін. Осындай маңызды жауапкершілікті алып шыққан ІІІ шақырылым мүшелеріне алғыс айтамын.
Отырыс барысында Шымкент қаласы қоғамдық кеңесінің мүшелері арасынан, кеңес мүшелерінің ұсынысымен, ашық дауыс беру арқылы «Shymkent» ӘКК» АҚ Шымкент қаласындағы Филиал директорының орынбасары Парманов Бұхарбай Рысқұлұлы кеңес мүшелерінің ұсынысымен қоғамдық кеңес төрағасы болып сайланды.
Қоғамдық кеңестің жаңа төрағасы Бұхарбай Рысқұлұлына және мүшелеріне сәттілік тілеймін. Азаматтық қоғам өкілдері ретінде бұл жүкті абыроймен алып шығады деген сенімдемін.
