Жыл басынан бері 1 680 жабайы жануардан талану фактісі тіркелген

Шымкентте иесіз жануарлардан зардап шеккендер қатары артып отыр. Былтыр 6 айда 700 адам зардап шексе, биыл 900 адам қаңғыған ит-мысық пен басқа да тіршілік иелеріне таланған. Үй жануарынан зардап шеккенннің бірі Құдиярхан Махатов. Сырласымен аулада әңгімелесіп тұрғанда, сыныптасының кәндені қара санынан қапқан. Ақсақал дереу ақ халаттыларға жүгініп екпесін алыпты.

 Елімізде қаңғыбас ит-мысықтарды атып, жоюға тиым салынған. Жаңа тәртіп бойынша ветеринар мамандар иесіз итті аулап, кострациялап, екпесін егіп, ұстаған жеріне қайта жіберу керек. Осылайша бұралқы қамсыз өмірін жалғастыруы тиіс. Десекте соңғы уақытта Шымкентте иесіз ит-мысыққа таланғандар қатары күрт өскен. Өткен жылдың тиісті кезеңімен салыстырғанда биыл зардап шеккендер саны 200 адамға артып отыр.

 Шымкентте әр жылы 3 мыңнан астам адам жануарлардан зардап шегеді екен. Жыл басынан бері жалпы 1 680 талану фактісі тіркелген. Төрт аяқтының төртеуінен құтыру індеті анықталған. 25 адам антирабиялық көмекке жүгініп, құтыруға қарсы вакцина алған.

Қаңғыбас иттердің мәселесі бойын­ша елімізде жаңа заң қабыл­данды. Бұл заң азаматтар тарапынан талқыланды, әлі де талқылануда. Нәтижесінде қазақстандықтардың қаңғыбас иттерге қатысты көзқарасы қақ жарылды. Бірінші тарап «Иесіз үй жануарларынан келетін қауіп көп, сондықтан оларды аулап, атып болсын санын азайту керек» десе, келесісі «Иесіз ит пен мысықты өлтіру – жауыздық, мемлекет гуманизм қағи­даларын сақтап, бұларға пана тауып беру керек» дейді.

Әрине қоршаған ортаны қорғау, жануарларға жанашыр­лық таныту адамзат үшін ортақ міндет екені түсінікті. Осы орайда Мемлекет бас­шы­сының бастамасымен елімізде «Жануарларға жауапкершілікпен қа­­рау туралы» заң қабылданды. Енді дамыған елдер секілді бізде де жануарларға деген қөзқарас өз­гер­мек. Яғни жаңа заң бойынша «Ит-мысықтарды асырау және се­руен­дету қағидалары, қаңғыбас ит­тер мен мысықтарды аулау және жою қағидалары» деген сөздер «Үй жануарларын ұстау және серуендету қағидалары, жануарларды аулау, уақытша ұстау және жансыздандыру қағидалары» деген сөздермен ауыс­қан. Сол себепті қазіргі кезде елде қаң­ғыбас иттер мен мысықтарды ау­лау және жою жұмыстары тоқтап тұр.