Жүйке жүйесі — бұл адам денесінің маңызды және күрделі бөлігі. Ол өмірдің барлық қырын бақылайтын үлкен желі іспетті. Ас қорыту, сезу, сезіну, тыныс алу осының барлығы жүйке жүйесінің күрделі функциялары. Жүйке жүйесінің зақымдануы бас ауруы, зейін қоюда қиындықтарға, сондай-ақ тердің шамадан тыс бөлінуі сынды ауруларға алып келеді. Аталмыш аурудың алдын алып, сырқатты емдеуде шымкенттік дәрігерлік ауыз толтырып айтарлықтай жетістіктерге жетуде. Шымкент қалалық №3 аурухананың дәрігерлері жүйке жүйесі ауруынан жүре алмай қалған 74 жастағы науқасты аяққа тұрғызды. Зейнеткер ауыр дерттің салдарынан қайта сауығудан күдер үзген. Үздіксіз емнің нәтижесі ақ халатты жандар мен қарияның ортақ жеңісі болып отыр.
Бүгінгі таңда жүйке жүйесі ауруы үздіксіз медициналық көмек пен оңалту шараларын талап ететін күрделі дерттің бірі саналады. Әсіресе созылмалы ми қан тамырларының ауруы, эпилепсия, Паркинсон ауруы, инсульт, дисциркуляторлық энцефалопатия сынды ауру түрлері кең тараған.
Міндетті әлеуметтік медициналық сақтандыру жүйесінде бұл ауруға шалдыққан науқастарды емдеу мәселесіне ерекше көңіл бөлінген. Медициналық көмектің басым көпшілігі МӘМС есебінен қаржыландырылады.
Мәселен, Шымкент қалалық №3 аурухананың жүйке бөлімінде жыл басынан бері 1000-нан астам адам стационарлық ем қабылдаған. Олардың 70 пайыздан астамы міндетті әлеуметтік медициналық сақтандыру шеңберінде емделген. Меңгерушісі Гүлжахан Бердалиеваның жетекшілігімен талай жанның дертіне дауа дарытқан бөлімнің медициналық көмек пен қызмет көрсету деңгейлері жоғары сұранысқа ие. Науқастар тіркелген емханаларынан жолдаманы осы ауруханаға беруді жиі өтінеді. Оның сыры – жүйке бөлімі қызметкерлерінің ерекше мейірім, қамқорлығында көрінеді.
Жалпы МӘМС шеңберінде сақтандырылған азаматтарға тіркелген емханасы бойынша жоғары технологиялы медициналық көмек, профилактикалық тексерулер мен оңалту шаралары, консультациялық-диагностикалық қызметтер мен есепте тұрған науқастарға дәрі-дәрмектер қолжетімді. Қаладағы медициналық мекемелерде былтыр 120 мыңға жуық науқас стационарлық жағдайда емделген. Оның ішінде 100 мыңға жуығы МӘМС қаражаты есебінен ем қабылдады.
Айта кетейік, дәрігерлер жүйке жүйесінің тұрақты болуы үшін пайдалы тамақтанып, жиі жаяу жүруді және күйзеліске түсудің алдын алуды ескертеді.
