Түркістан қалалық мәслихатының тұрақты комиссиясы біріккен отырысы өтті. Жиынды қалалық мәслихаттың төрағасы Ғаппар Сарсенбаев ашып, жүргізді. Отырысқа қала әкімінің орынбасарлары, мәслихат депутаттары және қалалық дербес бөлім басшылары қатысты. Бұл отырыста қаланың әлеуметтік-экономикалық даму мәселелері мен алдағы жылдарға арналған бюджетке қатысты бірқатар маңызды сұрақтар талқыланды.
Тұрақты комиссияның біріккен отырысында бірнеше маңызды мәселе қаралды. Алдымен, Түркістан қаласының 2025-2027 жылдарға арналған қалалық бюджеті туралы ұсыныс талқыланды. Қала әкімінің орынбасары Төлегенов Талғат Байжанұлы бұл мәселе бойынша баяндама жасап, алдағы жылдарда қаланың инфрақұрылымын дамыту, әлеуметтік бағдарламаларды жүзеге асыру және мәдениет, спорт саласын нығайту бағытындағы жоспарларын айтып өтті. Сондай-ақ, қосымша хабарламашылар ретінде қалалық әкімдіктің инфрақұрылым және коммуникациялар бөлімінің басшысы Нұрлан Тілешұлы, жұмыспен қамту және әлеуметтік бағдарламалар бөлімінің басшысы Бейсенова Эльмира Тұнғышбайқызы, мәдениет, тілдерді дамыту, дене шынықтыру және спорт бөлімінің басшысы Мұсағалиев Қадырболат Қабдирұлы, ішкі саясат бөлімінің басшысы Тулепбергенов Женісәлі Бақытжанұлы өз бөлімдерінің атқарған жұмыстары мен алдағы жоспарлары туралы сөз алды.
Қала бюджетіне қатысты көптеген сұрақтар қойылып, оларға жауаптар берілді. Қала тұрғындарының әлеуметтік жағдайын жақсарту, жастардың жұмысқа орналасуын қамтамасыз ету және қаланың мәдениет саласын дамыту бағытындағы ұсыныстар талқыланды. Бұл мәселелер қалалық мәслихат депутаттары тарапынан ерекше назарға алынды.
Келесі мәселе бойынша Түркістан қалалық мәслихаты төрағасының және тұрақты комиссия төрағаларының 2024 жылы атқарған жұмыстары туралы есептері тыңдалды. Мәслихат төрағасы Ғаппар Сарсенбаев өз есебінде өткен жылы атқарылған жұмыстар мен алдағы міндеттер туралы ақпарат беріп, қалалық мәслихаттың елдің әлеуметтік-экономикалық дамуына қосқан үлесін атап өтті. Тұрақты комиссия төрағалары да өз бағыттары бойынша жұмыс барысымен таныстырып, алдағы жылдарға арналған жоспарларын ортаға салды.
Отырыс барысында Түркістан қалалық мәслихатының 2025 жылға арналған жұмыс жоспары және шығындар сметасы да талқыланды. Депутаттар бұл жоспардың жүзеге асуы үшін қажетті шараларды белгіледі және қаланың даму стратегиясымен байланысты маңызды мәселелерді көтерді. Жұмыс жоспары негізінде қаланың инфрақұрылымын жаңарту, әлеуметтік саланы дамыту және халықтың әл-ауқатын арттыруға бағытталған жобалар ұсынылды.
Комиссия отырысының соңында қалалық мәслихат депутаттары бірқатар көкейтесті сұрақтарды қойып, бөлім басшылары өз кезегінде жауап берді. Қала тұрғындарын толғандырған мәселелер, соның ішінде әлеуметтік көмек, тұрғын үй, білім беру салаларындағы жаңашылдықтар мен мемлекеттік бағдарламалар туралы сұрақтар көтерілді. Отырысқа қатысушылар бұл мәселелердің өз уақытында шешімін табуына сенім білдірді.
Түркістан қаласының даму жоспарлары мен бюджеттік мәселелерге қатысты осындай ауқымды отырыс қаланың болашақта алға басуына, тұрғындардың әл-ауқатын арттыруға бағытталған тиімді шешімдер қабылдауға ықпал ететіні сөзсіз.
