Түркістан қаласындағы кәріз жүйесін жетілдіру — бұл аймақтың инфрақұрылымын жақсартуға бағытталған маңызды мәселе. Соңғы жылдары Түркістан облысының орталығы ретінде қала қарқынды дамып келеді, халық саны өсуде, жаңа тұрғын үйлер, әлеуметтік және туристік нысандар салынуда. Мұндай урбанизация жағдайында кәріз жүйесінің сапалы жұмыс істеуі — қала тіршілігінің негізі.
Түркістандағы кәріз жүйесінің негізі кеңестік кезеңде қаланған. Қаланың ескі бөлігі мен шеткі аудандарында кәріз желілері тозып, жиі істен шығады. Сонымен қатар, соңғы жылдары бой көтерген жаңа тұрғын үйлер мен туристік кешендерге заманауи кәріз жүйесімен қамтамасыз ету қажеттілігі туындап отыр.
Бүгін Түркістан қаласының әкімі Әзімбек Пазылбекұлы арнайы брифинг өткізіп, 2025 жылдың қаңтар-мамыр айларындағы әлеуметтік-экономикалық даму көрсеткіштері бойынша атқарылған жұмыстар жөнінде баяндама жасады. Брифинг барысында қала аумағында жүзеге асырылып жатқан кәріз жүйелерін дамыту мәселесі де кеңінен талқыланды.
Қала басшысы кәріз инфрақұрылымын жетілдіруге қатысты бірқатар өзекті мәселелерді атап өтті. 2020-2025 жылдар аралығында Түркістан қаласында кәріз жүйелерін дамыту бағытында ауқымды жобалар іске асырылуда. Қазіргі таңда жалпы ұзындығы 263,3 шақырымды құрайтын сарқынды су жүйелерін тарту жұмыстары жүргізіліп жатыр. Бұл жұмыстар қала аумағындағы магистралды желілермен қатар, ішкі орам көшелерін де қамтуда.
Жобалар аясында қала аумағында инженерлік инфрақұрылымды толық қамту мақсатында бірқатар құрылыс нысандарының салынуы жоспарланған. Атап айтқанда, 5 бірлік сарқынды суларды тазарту имараты, 21 бірлік канализациялық сорғы станциясы және 4 бірлік шығын реттегіш құдықтың құрылысы қарастырылған. Бұл нысандардың іске қосылуы кәріз жүйесінің қуаттылығын арттырып, халықты сапалы қызметпен қамтуға мүмкіндік береді.
Бүгінде Түркістан қаласында 27 КНС бар. Олардың 7-і 1980 жылы, 3-еуі 2010 жылы, ал 17-сі 2014 жылы пайдалануға берілген.
Қолданыстағы сарқынды су құбырларының ұзындығы 401,6 шақырымды құрайды. Бұл желілерге 17 581 абонент қосылған. Жалпы орталықтандырылған кәріз жүйесімен қамту көрсеткіші 36,5 пайыз деңгейінде.
Қала тұрғындарын толық кәріз жүйесіне қосу мақсатында қазіргі уақытта 13 нысанның құрылысы жүргізілуде. Оның ішінде 7 нысанды 2025 жылдың соңына дейін аяқтап, пайдалануға беру жоспарланған.
Қазіргі таңда кәріз жүйесінің құрылысы аяқталған 159 көшеде асфальт төсеу жұмыстары кезең-кезеңімен жүргізілуде. Қаланың негізгі магистралды көшелерінде жол жөндеу жұмыстары аяқталуға жақын. Ендігі кезекте, абоненттік қосылымдарды жедел іске асыру арқылы асфальттау жұмыстарын кешіктірмей аяқтау көзделуде.
Түркістанда кәріз жүйесін жетілдіру – тек техникалық мәселе емес, бұл – қала тұрғындарының әл-ауқаты мен қоршаған орта қауіпсіздігін қамтамасыз етудің маңызды бөлігі. Қазіргі қолға алынған шаралар мен болашақтағы жобалар Түркістанның заманауи, экологиялық қауіпсіз қала ретінде қалыптасуына жол ашады.
