Шымкент қаласында 20 қыркүйек күні дәстүрлі жалпы қалалық сенбілік ұйымдастырылды. Қоршаған ортаны қорғау мен қаланың тазалығын арттыруды мақсат еткен бұл шараға қала әкімдігі, аудандық әкімдіктер, мемлекеттік мекемелердің қызметкерлері, білім беру ұйымдарының ұжымдары, сондай-ақ еріктілер мен тұрғындар белсене қатысты.
Сенбілік барысында қаланың орталық көшелерімен қатар шағынаудандар мен тұрғын алаптар қамтылып, қоқыс-қалдықтар жиналды, арық-атыздар тазартылды, жасыл аймақтар күтіп-бапталды. Саябақтар мен гүлзарларда тазалық жұмыстары жүргізіліп, тұрмыстық қалдықтар арнайы полигондарға жеткізілді.
Ұйымдастырушылардың мәліметінше, шараға бірнеше мыңнан астам қала тұрғыны қатысып, жүздеген тонна қоқыс шығарылды. Сонымен қатар ағаштар мен бұталар ретке келтіріліп, қураған бұтақтар кесілді. Кейбір аумақтарда тұрғындардың өз бастамасымен гүлдер отырғызылып, шағын саябақтарды абаттандыру жұмыстары қолға алынды.
Жалпы қалалық сенбіліктің басты мақсаты – қала тазалығын сақтау ғана емес, әрбір тұрғынның туған жеріне деген жауапкершілігін арттыру болып табылады. Қала тұрғындары сенбілікке бір кісідей атсалысып, ортақ іске үлес қосты. Мұндай бастамалар экологиялық мәдениетті қалыптастырып қана қоймай, қоғамдағы бірлік пен ынтымақты күшейтуге ықпал етеді.
Қала әкімдігі сенбіліктің белгілі бір күндермен шектелмейтінін атап өтті. Жыл бойы жүйелі түрде жалғасатын тазалық жұмыстарының аясында күзгі мезгілде жапырақтарды жинау, ағаштарды қысқы маусымға дайындау, көгалдарды күтіп-баптау негізгі міндеттердің қатарында болмақ.
Жалпы қалалық сенбілік Шымкенттің көркін арттырып қана қоймай, тұрғындардың табиғатты қорғауға деген ықыласын оятты. Бірлескен еңбек пен ортақ жауапкершілік арқасында қала таза әрі жайлы ортаға айналатынына сенім білдірілді.
