Түркістан қаласының 31 Абай атындағы жалпы орта мектебінде жасөспірімдер арасында алаяқтық, құқықбұзушылық, қаржы пирамидасы және басқа да қоғам үшін қауіпті мінез-құлық түрлерінің алдын алу мақсатында ақпараттық-насихаттық шара ұйымдастырылды. Іс-шараға мектеп оқушылары мен ұстаздары қатысып, қоғамдағы тәртіпті сақтауға және жастардың құқықтық сауаттылығын арттыруға бағытталған түрлі бейнероликтер мен мәліметтер ұсынылды.
Бұл кездесу «Жастар арасындағы алаяқтық пен құқықбұзушылықтың алдын алу», «Қаржы пирамидасы мен лудомания», сондай-ақ, «Вандализм мен басқа да құқыққа қарсы әрекеттерге қарсы күрес» тақырыптарына арналды. Іс-шараның басты мақсаты — жастарға қоғамдағы зиянды әрекеттерден сақтанудың жолдарын көрсету, сондай-ақ оларды құқықтық тәртіпке баулу.
Жиналысқа Түркістан қалалық ішкі саясат бөліміне қарасты «Жастар ресурстық орталығы» КММ инспекторы Салтанат Ержанқызы, Түркістан қалалық полиция басқармасының жедел-профилактикалық бөлімінің учаскелік полиция инспекторлары Б. Мейірханов пен М. Қаражанов, мектептің тәрбие жұмысы жөніндегі орынбасары Самат Түкібаев және мұғалім Нұршат Жиенәлі қатысты.
Іс-шара барысында жастарды алаяқтық әрекеттер мен қаржы пирамидасының құрбаны болудан сақтандыру туралы кеңестер берілді. Полиция қызметкерлері оқу орнының оқушыларына қылмыс пен құқықбұзушылықтың алдын алу үшін қоғамда белсенді болуға және өз құқықтары мен міндеттерін білу маңызды екенін түсіндірді. Жасөспірімдер арасында кең таралған мәселе болып табылатын лудомания және ойынқұмарлықтың салдары туралы да ақпараттар ұсынылды.
Бейнероликтер арқылы оқушыларға алаяқтықтың қалай жүзеге асатыны, қаржы пирамидасының механизмдері мен оның зардаптары түсіндірілді. Сонымен қатар, құқықбұзушылықтың және вандализмнің жастардың өміріне теріс әсері туралы да әңгімелесіп, олардың алдын алу шаралары айтылды.
Мектеп басшылығы мен мұғалімдер де бұл кездесуді өте маңызды деп бағалап, оқушылардың қоғамдағы жауапкершілігін арттыру және олардың заңды құқықтарын қорғау мәселесіне ерекше назар аударды. Оқушыларға құқықтық сауаттылықты арттыру мақсатында арнайы сабақтар мен қосымша шаралар өткізу жоспарланды.
Кездесуде құқық қорғау органдарының өкілдері мен мектептің тәрбие қызметкерлері арасында өзара тығыз байланыс орнап, жастар арасында құқықбұзушылықтың алдын алу бойынша бірлескен іс-шаралар жүргізудің маңыздылығы туралы пікір алмасылды.
Аталған шараның ұйымдастырылуы жастардың заңға деген құрметін арттыруға және өзара тәртіп сақтауға бағытталған зор қадам болып табылады. Жиналыс соңында қатысушылар өздерін қызықтырған сұрақтарын қойып, қажетті кеңестер мен ақпараттар алды.
