Сайрам ауданы — Қазақстанның оңтүстік өңіріндегі ауыл шаруашылығына бейім, табиғи-климаттық жағдайы қолайлы, халық тығыз қоныстанған аумақтардың бірі. Аудан халқының көпшілігі ауыл шаруашылығымен, оның ішінде егіншілік пен мал шаруашылығымен айналысады. Соңғы жылдары агроөнеркәсіп кешенін дамыту, ауыл тұрғындарының әл-ауқатын арттыру және ішкі нарықты сапалы азық-түлікпен қамтамасыз ету маңызды міндеттердің біріне айналып отыр. Осы орайда, мал шаруашылығын өркендету — аймақ экономикасын нығайтудың басты тетігі.
Сайрам ауданының климаты — жылы, жауын-шашын мөлшері жеткілікті, жайылым жерлері мол. Бұл жағдай мал шаруашылығын кең көлемде жүргізуге мүмкіндік береді. Аудан аумағында ірі қара мал, қой, ешкі, жылқы, құс және ара шаруашылығы дамып келеді. Алайда бұл салалардың мүмкіндігі толық пайдаланылып отырған жоқ.
Мал шаруашылығын дамытудың басты бағыттарының бірі — етті және сүтті бағыттағы ірі қара мал өсіру. Бұл бағытта өнімділігі жоғары асыл тұқымды мал басын көбейту, селекциялық жұмыстар жүргізу маңызды. Сондай-ақ қой шаруашылығы — аудан үшін дәстүрлі сала. Ет пен жүн өнімдеріне ішкі нарықта да, сыртқы нарықта да сұраныс жоғары.
Қазіргі таңда құс шаруашылығы мен ара шаруашылығын да кеңейтуге болады. Бұл бағыттарда шығын аз, бірақ пайдасы мол, әрі ауыл тұрғындарын жұмыспен қамтуға мүмкіндік мол.
Мал шаруашылығын дамытудың тағы бір тетігі — мемлекеттік бағдарламалар арқылы қолдау көрсету. Атап айтқанда, «Ауыл аманаты», «Агробизнес», «Сыбаға», «Алтын асық», «Құлан» сияқты бағдарламалар арқылы шаруаларға жеңілдетілген несие, субсидия, техника лизингі қарастырылған. Сонымен қатар, мал азығын дайындайтын базаларды, заманауи қора-жайларды, сүт және ет өңдейтін шағын цехтарды ашуға жағдай жасау қажет.
Таяуда облыс әкімі Нұралхан Көшеров Сайрам ауданына жұмыс сапарымен келіп, шаруаларға «Ауыл аманаты» жобасы аясында «Trade-In» бағдарламасы арқылы жаңа техникаларды тапсырды. Өңір басшысы ауыл шаруашылығы саласының техникалық паркін жаңарту бағытында жұмыс жандана түсетінін жеткізді.
– Бүгін сіздермен маңызды әрі қуанышты сәтте жолығып тұрмыз. Мемлекет басшысы Ауыл шаруашылығы еңбеккерлерінің бірінші форумында ауыл шаруашылығы техникаларын жаңарту міндетін жүктеді. Облыс көлемінде 11 мыңнан астам ауыл шаруашылығы техникасы бар. Оның 3 мыңы ескіріп, пайдалану мерзімі 20 жылдан асқан. Осы мәселені шешу мақсатында алдағы 5 жылда ауыл шаруашылық техникалары паркін 35 пайызға жаңарту жоспарымыз бар. Міне, осы бастама аясында нақты жұмыс басталып кетті. Соның айғағы ретінде бүгін 46 техниканы «Trade-In» бағдарламасы аясында жаңартып, өздеріңізге тапсырғалы отырмыз. Аталған қолдау шараларының нәтижесінде сіздер жаңа техникамен ауыл шаруашылығын дамытуға сүбелі үлес қосады деп сенемін. Баршаңызды құттықтай отырып, жұмыстарыңызға табыс тілеймін! – деді Нұралхан Көшеров.
Техникаға қол жеткізген шаруалар бастамаға ризашылықтарын білдірді. Аймақта ауыл шаруашылығы техникаларын жаңарту жұмыстары жалғасады.
Ауыл шаруашылығы өнімдерін тек өндірумен шектеліп қалмай, өңдеу саласын дамыту маңызды. Сайрам ауданында өндірілген сүт, ет, тері, жүн өнімдерін қайта өңдеу арқылы қосымша құнды өнім шығаруға болады. Бұл аудан бюджетіне түсетін салық көлемін арттырып, жаңа жұмыс орындарын ашуға сеп болар еді.
Сайрам ауданында мал шаруашылығын дамыту — экономикалық, әлеуметтік және экологиялық тұрғыдан тиімді бағыт. Табиғи мүмкіндіктерді тиімді пайдалана отырып, ғылым мен технологияны енгізіп, мемлекеттік қолдауды ұтымды пайдалану арқылы агроөнеркәсіп кешенін жаңа деңгейге көтеруге толық мүмкіндік бар. Бұл тек аудан экономикасының дамуына емес, бүкіл өңірдің азық-түлік қауіпсіздігіне үлкен үлес қосары анық.
