Ағымдағы жылдың 4 маусымында “Астана” шағын ауданының тұрғындарымен аумаққа кіріп-шығатын жол (заезд) мәселесі бойынша кездесу өткен болатын. Кездесу барысында тұрғындар шағын ауданға кіреберіс жолдың жоқтығынан туындаған қиындықтарды айтып шағымданды. Әсіресе, көліктердің жүріп-тұруының қиындауы, жедел жәрдем және өрт сөндіру көліктерінің кешігуі сияқты мәселелер көтерілді.
Тұрғындардың көтерген мәселесі назарға алынып, қаланың бас жоспарына сәйкес тиісті жұмыстар қолға алынды. Қысқа мерзім ішінде кіреберіс жол салынып, халық игілігіне берілді. Бұл шағын аудан тұрғындарының көптен күткен мәселесінің шешімін тапқанын білдіреді.
Жаңадан салынған жолдың пайдалануға берілуі “Астана” шағын ауданының тұрғындары үшін үлкен қуаныш сыйлады. Енді тұрғындар қалаға еркін кіріп-шыға алатын болды. Бұл сонымен қатар аймақтың инфрақұрылымын жақсартып, тұрғындардың өмір сүру жағдайын жақсартады. Жаңа жолдың құрылысы аясында абаттандыру жұмыстары да жүргізіліп, аймақтың көркі арта түсті. Бұл шара шағын ауданда тұратын балалардың қауіпсіздігін қамтамасыз етіп, тұрғындардың жайлы өмірін арттыруға бағытталған. Әкімдік өкілдері тұрғындармен тұрақты байланыста болып, олардың ұсыныстары мен тілектерін ескеруге дайын екендіктерін жеткізді. Осындай ынтымақтастық арқасында қаламыздың әрбір тұрғыны өзінің үні естілетініне және мәселелері шешімін табатынына сенімді болады. “Астана” шағын ауданының тұрғындары әкімдікке және жол құрылысына атсалысқан барлық азаматтарға алғыстарын білдірді. Әкімдік тарапынан жасалған бұл қадам тұрғындардың билікке деген сенімін арттырып, халықтың әл-ауқатын көтеруге бағытталған жұмыстардың жалғасы болып табылады. Болашақта да осындай игі істер жалғасын табады деп сенеміз.
