Түркістан қаласында «Таза Қазақстан» жобасы аясында қала тұрғындарының қатысуымен жалпықалалық сенбілік ұйымдастырылды. Бұл шараға мыңнан астам адам қатысты, олардың қатарында қала әкімі Әзімбек Пазылбекұлы, мемлекеттік қызметкерлер, ардагерлер, мәслихат депутаттары, облыстық басқармалар мен департаменттер, коммуналдық сала қызметкерлері, тұрғындар мен кәсіпкерлік нысан иелері, сондай-ақ белсенді жастар болды.
Сенбілік – қаланың тазалығын сақтауға және экологиялық мәдениетті қалыптастыруға бағытталған маңызды шара. Әр сенбі сайын өтетін бұл шара дәстүрге айналып, қала тұрғындарына ортақ жауапкершілік жүктейді. Қатысушылар бекітілген кестеге сәйкес, өздерінің жұмыс орындары мен шағынаудандарындағы көпқабатты тұрғын үйлердің аулаларын, қоқыс жәшіктері мен балалар ойын алаңдарын, сондай-ақ ирригациялық арық жүйелерін қоқыстан тазартып, көшеттер отырғызды.
Қаланың сырт аймақтарында да тазалық жұмыстары жүргізілді. Кәсіпкерлік нысандарының заңсыз жарнамалары алынып, ағаш түптері әктелді. Бұл жұмыстардың барлығы Түркістан қаласының көркін арттыру және экологиялық ахуалды жақсарту үшін жасалуда. Сондай-ақ, тазалық пен көгалдандыру жұмыстарына екі мердігер мекеме – «Түркістан-Жарық тазалық» ЖШС және «Жасыл қала – Green city» ЖШС жауапты. Қаланың 875 көшесіне қызмет көрсететін бұл мекемелер әртүрлі аумақтарда тазалық жұмыстарын тұрақты түрде жүргізіп келеді.
Жалпы, қала тұрғындарының тазалық шараларына белсене қатысуы да айтарлықтай. Сенбілік акциясы аясында апта сайын қаланың 2 мыңға жуық тұрғыны өз үйлерінің маңайын және аулаларын таза ұстап, қала тазалығына үлес қосады. Биылғы жылдың басынан бері мемлекеттік мекемелер мен ведомстволардың қатысуымен 65-тен аса сенбілік ұйымдастырылып, қала тұрғындарына арнайы экологиялық мәдениет пен тазалықты сақтаудың маңыздылығы түсіндірілді.
Ағаш отырғызу жұмыстары да қалада қарқынды жалғасуда. Көктем айларында «Жасыл Түркістан» КММ, «SK geokart» ЖШС және коммуналдық мекемелердің күштерімен 106 943 түп ағаш көшеттері отырғызылды. Ал күз мезгілінде 41 398 түп ағаш көшеттері отырғызылды. Сонымен қатар, бүгін «Таза Қазақстан» сенбілік акциясы аясында қала аумағында 5000 түп алма, алмұрт, жиде, ива, акация, айлант және қараағаш көшеттері отырғызылды. Бұл жұмыстардың мақсаты қала экологиясын жақсарту және тұрғындарға табиғатпен үйлесімді өмір сүру ортасын ұсыну болып табылады.
Түркістанда 620 көгалды аймақ, 32 саябақ пен аллея бар, және бұл жерлердің әрқайсысы тұрғындар мен қала қонақтарына тынығуға, серуендеуге мүмкіндік береді. Қала әкімі мен қоғамдық ұйымдардың қолдауымен қаладағы көгалдандыру жұмыстары қарқынды жүргізілуде, әрі тұрғындар мен қонақтар үшін тазалық мәдениеті күн сайын жақсарып келеді.
Қала тұрғындарына өз аулаларын таза ұстап, қалаға жанашырлықпен қарау шақырылады. Тазалық шараларына қатысу – әрбір азаматтың міндеті ғана емес, ең бастысы, бұл – туған қаланың көркі мен экологиялық ахуалы үшін маңызды қадам.
