Шымкент қаласы Қаратау ауданында экологиялық мәдениетті дамыту, қоршаған ортаны қорғау және тұрмыстық қалдықтарды басқару бағытында маңызды жұмыстар атқарылып келеді. Бұл шаралар елімізде қабылданған «Таза Қазақстан» тұжырымдамасы аясында іске асырылуда.
Аудан аумағында тазалық сақтау, қоқыс шығару жүйесін жетілдіру, қатты тұрмыстық қалдықтарды сұрыптау және қайта өңдеуге жіберу жұмыстары кезең-кезеңімен жолға қойылған. Арнайы мердігер мекемелер бекітіліп, көше-көшелер мен аулалардан тұрмыстық қалдықтарды дер кезінде шығару үшін жаңа техникалар мен арнайы контейнерлер орнатылуда.
Сонымен қатар, аудан тұрғындарының экологиялық жауапкершілігін арттыруға ерекше көңіл бөлінуде. Мектептерде, балабақшаларда және қоғамдық орындарда экологиялық акциялар, сенбіліктер мен түсіндіру жұмыстары ұйымдастырылып, жастарды табиғатқа жанашырлықпен қарауға тәрбиелеу қолға алынған.
«Таза Қазақстан» тұжырымдамасының басты мақсаты – қалдықтарды азайту, оларды қайта өңдеу үлесін арттыру және қоршаған ортаны қорғау. Осы бағытта Қаратау ауданында қалдықтарды сұрыптайтын жоба енгізіліп, тұрғындар пластик, шыны, қағаз сияқты қайталама шикізатты бөлек жинауға шақырылуда. Бұл бастама экологиялық тиімділікті арттырып қана қоймай, қайта өңдеу өнеркәсібінің дамуына серпін береді.
Аудан әкімдігі мен экологиялық ұйымдардың бірлескен іс-қимылы нәтижесінде соңғы жылдары көшелер мен аулалардың санитарлық жағдайы жақсарып, тұрғындар арасында тазалық мәдениетін қалыптастыруда оң өзгерістер байқалуда.
«Таза Қазақстан» тұжырымдамасы тек қана тазалық шаралары емес, бұл – әрбір азаматтың өмір сапасын жақсартуға бағытталған маңызды қадам. Қаратау ауданындағы жұмыстар алдағы уақытта да тұрақты түрде жалғасын тауып, тұрғындарға экологиялық тұрғыдан жайлы орта қалыптастыруға қызмет етпек.
