Қаратау ауданының әкімі Алмас Абаев Алтын орда шағынауданына арнайы барып, жергілікті тұрғындармен кездесу өткізген болатын. Кездесу барысында халық өздерін толғандырған бірқатар мәселелерді ортаға салып, соның ішінде инженерлік инфрақұрылымға қатысты түйткілдерге ерекше назар аударды.
Әсіресе, шағынаудан көшелерінде жүргізілген асфальттау жұмыстары кезінде абайсызда жабылып қалған канализация люктерінің қолжетімсіздігі тұрғындар үшін үлкен қолайсыздық туғызған еді. Аталған мәселе аудан әкімі Алмас Абаевтың тікелей бақылауына алынып, тиісті мамандарға жедел түрде тапсырма берілді.
Қазіргі таңда Алтын орда шағынауданындағы асфальтпен жабылып қалған канализация люктері толықтай ашылып, қайта ретке келтірілді. Бұл жұмыс коммуналдық сала қызметкерлерінің қатысуымен жүзеге асырылып, тұрғындардың өтініші уақтылы шешімін тапты.
Әкімдік өкілдерінің айтуынша, алдағы уақытта инженерлік инфрақұрылымға қатысты осындай олқылықтарға жол бермеу үшін мердігер мекемелердің жауапкершілігі күшейтіледі. Сонымен қатар, кез келген құрылыс және абаттандыру жұмыстарында сапаны басты назарға алу қажеттілігіне ерекше мән берілуде.
Тұрғындар өз кезегінде көтерілген мәселенің қысқа мерзім ішінде шешілгеніне ризашылық білдіріп, аудан әкімі Алмас Абаевқа алғыстарын жеткізді. Бұл қадам халық пен билік арасындағы ашық диалогтың және бірлескен жұмыстың нақты нәтижесі болып отыр. Бұл бастама өзге шағынаудандарда да жалғасын тауып, тұрғындардың күнделікті өмір сапасын жақсартуға ықпал етпек. Қаратау ауданы әкімдігі халықтың әрбір өтінішіне құлақ асып, оны шешуде жүйелі әрі ашық жұмысты жалғастырады.
Аудан халқы да өз тарапынан тазалық пен тәртіпке үлес қосып, билікпен бірлесе жұмыс істеуге дайын екенін жеткізді. Осындай өзара қолдау ғана Қаратау ауданын жайлы әрі заманауи орталыққа айналдыратыны сөзсіз.
