Шымкент қаласында биыл әлеуметтік қолдау және жұмыспен қамту шаралары бойынша елеулі өзгерістер мен жетістіктер орын алды. Қалада жұмыспен қамту шараларын нақты көрсеткіштер мен мақсаттарға сай жүзеге асырылуда.
Мегаполисте осы жылы 56,9 мың адамды жұмыспен қамту шараларына қатыстыру жоспарланып, 2024 жылдың 1 тамызына дейінгі жағдай бойынша 27 168 адам қатысып отыр. Мұнан өзге 30 207 адамды мемлекеттік бағдарламалар шеңберінде жұмысқа жалдау, қысқа берзімді кәсіптік оқу және кәсіпкерлік бастамаларына қатыстыру көзделіп, 7 айдың қорытындысымен оған 17 163 адам қатысуда. Оның ішінде 7 453 адамды субсидияланатын жұмыс орындарына жолданған. Шымкенттің даму жоспары мен жеке кәсіпкерлердің бастамасымен жаңадан құрылатын жұмыс орындарына 10 003 адам орналасқан.
2019 жылдан бері халықтың әлеуметтік жағынан әлсіз топтарына жататын азамттардың бизнес-жобаларын қолдау үшін 400 АЕК-ке дейінгі қайтарымсыз грант беріліп келеді.
Биыл Шымкентте 426 адамға грант беру жоспарланып, комиссияның шешімімен 428 адамның бизнес-жобасын қолдауға қайтарымсыз қаржы мақұлданды. Жоспардың артығымен орындалуының себебі – комиссия өкілдері 400 АЕК-ке дейінгі қаржыны оңтайландырып, тағы екі адамға грант тағайындау мүмкіндігі жасалды.
Комиссия құрамында қалалық кәсіпкерлік және индустриалды-инновациялық даму басқармасының мамандары, қала мәслихатының депутаттары, қоғамдық бірлестік өкілдері, журналистер, қалалық қоғамдық кеңес мүшелері және кәсіпкерлер болды.
Грант алуға екі лекте жалпы 2 426 адамнан өтінім түсті. Комиссия мақұлдаған бизнес-жобалардың 44-і мал және құс шаруашылығы, 100—і қызмет көрсету салалары, 56 жоба кондитер және нан өнімдері, 84-і тігін, 31 жоба жартылай фабрикаттар, 8-і жиһаз өндірісі, 62 жоба өндіріс саласы және 43-і қоғамдық тамақтану орындары іске қосу жобасын құрады.
Комиссия отырысының ашықтығын қамтамасыз ету үшін әлеуметтік желілердегі ресми парақшалар арқылы тікелей эфир қосулы болды.
400 айлық есептік көрсеткіш 1 476 800 теңгені құрайды. Қайтарымсыз грант қаржысын несиені өтеуге, жылжымайтын мүліктерді сатып алуға және акцизделетін өнімдерді өндіруге қолданылмайды.
