Қоршаған ортаны қорғау – тек үлкен жобалар мен арнайы бағдарламалар арқылы емес, әрқайсымыздың күнделікті дағдымыздан басталады. Осы мақсатта Қаратау ауданының “Алтын Орда” шағын ауданында өткен кезекті сенбілік барысында қатысушыларға қызықты сұрақ қойылды:
«Күнделікті экологиялық әдеттеріңіз қандай?»
Бұл сұрақ көпшілікті ойландырды. Сенбілікке қатысқан тұрғындар мен қызметкерлер өз тәжірибелерімен бөлісіп, табиғатты қорғаудың қарапайым жолдарын атап өтті.
Мысалы, аудандық қызметкер Гүлнұр Ж. былай дейді:
«Мен үйде қалдықтарды сұрыптап жинауға тырысамын. Пластик, қағаз, шыны секілді қалдықтарды бөлек қоямын. Әр сөмкені қайта пайдалануға дағдыландым. Бастапқыда қиын көрінгенмен, кейін өзіме әдетке айналып кетті».
Ал басқа қатысушы Ермек А. суды және энергияны үнемдеуді басты ұстанымына айналдырғанын айтты:
«Жуынғаннан кейін кранды ашық қалдырмаймын, жарық шамдарын тек қажет кезінде ғана қосамын. Бұның бәрі ұсақ-түйек сияқты, бірақ егер әр адам осылай жасаса, үлкен өзгеріс болады».
Кей тұрғындар сенбі сайын отбасы мүшелерімен бірге ауланы тазалап, ағаштарға су құятынын айтты. Мұндай қарапайым іс табиғатты қорғау мәдениетін балаларға да сіңіреді.
Сенбілік барысында қатысушылар өз қолдарымен ағаш көшеттерін отырғызып, қоқыстарды жинап, аумақты ретке келтірді. Көпшіліктің пікірінше, тазалық пен тәртіп — адам бойындағы жауапкершіліктің айнасы.
«Біз қоршаған ортаға қалай қарасақ, табиғат та бізге солай жауап береді. Таза ортада өмір сүру – бәріміздің ортақ міндетіміз», – дейді сенбілікке қатысушы Әсем Е.
Осындай іс-шаралар тек аумақты тазартумен шектелмейді, олар адамдардың табиғатқа деген көзқарасын өзгертеді.
Қатысушылардың пікірінше, экологиялық әдеттерге үйрену үшін үлкен күш қажет емес – ең бастысы, ниет пен тұрақтылық керек.
Күнделікті өмірде суды үнемдеу, қоқысты сұрыптау, ағаш отырғызу, бір реттік пластиктен бас тарту – шағын ғана істер, бірақ олар табиғаттың болашағын сақтап қалуға үлкен үлес қосады.
Табиғатты қорғау – ұран емес, өмір салты.
Бүгіннен бастап экологиялық әдет қалыптастыру – ертеңгі таза әрі жайлы қаланың кепілі.
