Қала дамуы тек орталық көшелердің абаттандырылуымен өлшенбейді. Шын мәнінде, тұрғындардың өмір сапасын арттыру үшін шалғай елдімекендердің де көркеюі аса маңызды. Соңғы жылдары Шымкент қаласының Қаратау ауданында осы бағыттағы жұмыстар қарқын алып, халықтың тұрмыс жағдайын жақсартуға арналған жобалар жүйелі түрде жүзеге асуда.
Аудан аумағындағы «Тассай», «Шапырашты», «Нұртас», «Туран-1», «Мирас» және басқа да елдімекендерде жолдарды асфальттау, көше шамдарын орнату, ауыз су мен газ желілерін тарту, кәріз жүйесін жаңарту, балалар ойын алаңшаларын салу жұмыстары жүргізілуде. Бұрын тек орталық аймақтарда ғана байқалатын мұндай игіліктер бүгінде қала шетіндегі ауылдарға жетіп, тұрғындардың алғысына бөленіп отыр.
Қаратау ауданы тұрғындарымен жүргізілген сауалнама нәтижесінде халық ең алдымен инфрақұрылым саласындағы оң өзгерістерді ерекше атап өтті. Жаңа жолдар, жарықтандырылған көшелер, көгалдандырылған аулалар мен спорт алаңшалары – тұрғындардың күнделікті тұрмысын жеңілдетіп, қауіпсіздік пен жайлылықты қамтамасыз етуде. Бұл өзгерістер балалардың бос уақытын тиімді өткізуіне де мүмкіндік беруде.
Сонымен қатар тұрғындар шешімін күткен кейбір түйткілдерге назар аударды. Атап айтқанда, қоғамдық көлік қатынасын жақсарту, кейбір көшелерге кәріз жүйесін орнату, қоқыс шығару қызметінің сапасын көтеру және әлеуметтік нысандарды көбейту қажеттігі жиі айтылды. Әкімдік өкілдері әрбір ұсыныс назарға алынып, кезең-кезеңімен шешілетініне уәде берді.
Қала әкімі Ф. Сыздықбековтің пікірінше, шалғайдағы елдімекендерді дамыту – Шымкенттің әлеуметтік-экономикалық өрлеуінің басты бөлігі. Бүгінде аудан бойынша кешенді жоспарлар қабылданып, инфрақұрылымдық жобаларға қаржы бөлінуде. Мұндай қадамдар халықтың мемлекеттік билікке деген сенімін арттырып, ортақ мақсатқа жұмылуға ықпал етеді.
Қорыта айтқанда, Қаратау ауданында соңғы жылдары қолға алынған жұмыстардың нәтижесі айқын сезілуде. Тек орталықта ғана емес, шалғайдағы елдімекендерде де көркейту шаралары қарқынды жүргізіліп, тұрғындардың тұрмыс сапасы артып келеді. Бұл – мемлекет саясатының тиімділігін және жергілікті биліктің халықпен етене жұмыс істеуге ұмтылысын көрсететін нақты мысал.
