10 қазан күні Қаратау ауданының әкімі Алмас Абаев аудан тұрғындарымен кезекті азаматтарды жеке қабылдауын өткізді. Кездесудің басты мақсаты – тұрғындардың өтініштері мен ұсыныстарын тікелей тыңдап, көтерілген мәселелердің нақты шешу жолдарын анықтау.
Қабылдау барысында ауданның әр аумағынан келген тұрғындар өздерін толғандырған түрлі мәселелерді көтерді. Олардың қатарында тұрғын үй-коммуналдық шаруашылық, әлеуметтік көмек, инфрақұрылым, абаттандыру, жол мен жарықтандыру, сондай-ақ көпқабатты үйлердің аулаларын ретке келтіру сияқты тақырыптар қамтылды.
Әр азаматтың өтініші жеке тыңдалып, көтерілген мәселелер бойынша жауапты сала басшылары мен бөлім мамандарына нақты тапсырмалар берілді.«Біздің басты мақсатымыз – тұрғындардың өтінішіне бейжай қарамай, әр мәселенің нақты шешімін табу. Мұндай қабылдаулар арқылы халықтың шынайы қажеттілігін, нақты проблемаларды анықтауға мүмкіндік туады», – деді аудан әкімі Алмас Абаев.
Кейбір тұрғындар қоғамдық көліктің қозғалыс жиілігін арттыру, жол белгілерін орнату және көшелерді жарықтандыру туралы өтініш білдірді. Сонымен қатар, бірнеше азамат әлеуметтік қолдау және аула ішілік ойын алаңшаларын жөндеу мәселелерін көтерді.
Аудан әкімдігі өкілдерінің айтуынша, қабылдау барысында түскен өтініштер арнайы тіркеуге алынып, шешімін қажет ететін сұрақтар бойынша жұмыс тобы құрылды. Тиісті мекемелермен бірлесе отырып, мәселелердің орындалу барысы тұрақты бақылауға алынбақ.
«Мұндай кездесулер – билік пен халық арасындағы ашық диалог алаңы. Біз тұрғындармен жиі жүздесіп, олардың пікірін тыңдау арқылы ғана жұмысты тиімді ұйымдастыра аламыз», – деп атап өтті әкім.
Қаратау ауданында азаматтарды жеке қабылдау апта сайын және жоспардан тыс форматта өткізіліп келеді. Сонымен қатар, тұрғындар өз өтініштерін аудан әкімдігінің Call-орталығы, WhatsApp желісі және әкімдік ғимаратындағы қоғамдық қабылдау бөлмесі арқылы да жолдай алады.
Кездесу соңында Алмас Абаев аудан тұрғындарын белсенді болуға, өз ортасын жақсартуға атсалысуға және ортақ мәселелерді бірлесе шешуге шақырды.
«Тұрғындармен ашық байланыс орнату – біздің жұмысымыздың басты принципі. Әр ұсыныс пен пікір – ауданның дамуына қосылған үлес», – деді ол.
