Бала саулығы — кемел келешек кепілі

кемел

«Асар» шағынауданындағы қалалық балалар клиникалық ауруханасы базасынан «Балалар жасындағы ауруларды ықпалдастыра басқару» ресурстық орталығы ашылды. Үшінші мегаполисте алғаш рет қолға алынған оқыту-әдістемелік орталығының ашылу рәсіміне қала әкімінің орынбасары Сәрсен Құранбек, ҚР Денсаулық сақтау министрлігі Ана мен бала денсаулығын сақтау департаментінің директоры Мағрипа Ембергенова қатысты.

Орталықта медицина қызметкерлерін оқыту, ауруханада балаларын алып жатқан ата-аналарға 5 жасқа дейінгі күтім мен тамақтандыру мәселелері бойынша кеңес беріледі. Орталық оқу-әдістемелік материалдар мен жабдықтармен қамтамасыз етілген.

Қала әкімінің орынбасары ендігі ретте мамандардың біліктілігін арттыру, оқыту нәтижесіне талдау жүргізу маңызды екенін атап өтті.

– Бағдарлама балалардағы ең маңызды ауруларды (диарея, пневмония, тамақтанудың бұзылуы, анемия, төмен салмақ, тамақ-құлақ проблемалары) біріктіре, ықпалдастыра отырып емдеу, тез әрекет ету, сондай-ақ балаға қауіпсіз даму ортасын қалыптастыру, иммундау және күтім жасау нұсқамаларын қамтиды. Балалар жасындағы ауруларды ықпалдастыра басқару өлім, ауру және мүгедектік жағдайларын азайту және бес жасқа дейінгі балалардың өсуі мен дамуын жақсартуға ықпал етеді. Оқыту нәтижесіне мониторинг жасалады, – дейді аурухананың бас дәрігері Динара Жұмаділова. Көпшілік жаңадан ашылған орталықтың мүмкіндіктерімен танысты.

Қазақстанда балаларды тегін оңалту және оларды емдеу қарастырылған. Осы мақсатта БҒМ жыл сайын бюджеттен қаражат бөліп, кәмелетке толмаған балалардың медициналық қызметтерді тегін алуын қадағалайды. Өйткені, бүгінгі жас – ертеңгі елдің негізгі тірегі. Оған қазірден көңіл бөлу барлығымыздың кемел келешек алдындағы жауапты міндетіміз.