Алматыда 270 мыңнан астам тұрғын вакциналанды, олардың 30 мыңнан астамы 60 жастан асқандар

Коронавирустан екпе салдырған Алматы тұрғындарының жалпы саны 270 500 адамнан асты деп хабарлайды Алматы қаласының әкімдігі Баспасөз орталығы.

Бүгін өңірлік коммуникациялар қызметінің онлайн-брифингі барысында Алматы қаласы Қоғамдық денсаулық басқармасы басшысының орынбасары міндетін уақытша атқарушы Лаура Мырзағали мегаполисте егу науқанының қалай өтіп жатқанын айтты.


Лаура Мырзағали өзінің сөзінде «Спутник-V» препаратымен мақсатты топтарды иммундаудың 1 ақпанда, ал жаппай вакциналаудың ағымдағы жылдың 2 сәуірінде басталғанын еске салды. Спикер Алматыда бұрынғысынша 214 вакциналау пунктінің ашылғанын, 1 282 адамнан тұратын 315 егу бригадасының толық режимде жұмыс істейтінін хабарлады.

Айта кетерлігі,алматылықтар екпені медициналық ұйымдарда, мектептерде, СОО-да, базарларда, мәдениет және спорт нысандарында, тіпті мешіттерде де ала алады. Лаура Мырзағалидің айтуынша, вакциналау үшін медициналық ұйымдарда, мектептерде, мәдениет, спорт нысандарында, базарларда және қаланың СОО-да 250 егу пунктін іске қосу жоспарлануда, сондай-ақ жылжымалы пункттер де жұмыс істейді.

Онлайн-брифинг барысында Қоғамдық денсаулық басқармасының өкілі Алматы қаласы бойынша вакциналану статистикасын келтірді.

«Бүгінгі таңда барлығы 270 568 адам вакциналанды, оның ішінде 19 435 құқық қорғау органдарының қызметкері, 20 896 педагог, 27 045 медицина қызметкері. Қалғандары – диспансерлік есепте тұрған тұлғалар, студенттер, зейнеткерлер және 60 жастан асқандар, мемлекеттік қызметкерлер, қала тұрғындары», — деді Л. Мырзағали.

Жалпы егілген адамдардың ішінде 60 жастан асқандардың саны 30 421 адам. 2 991 адам қазақстандық QazVac вакцинасын салдырды. Қытайлық Sinopharm вакцинасы 3 365 адамға егілді.

Лаура Мырзағали қала мен ел тұрғындарын белсенді түрде вакциналануға шақырды, өйткені вакциналану арқылы ғана COVID-19-дан қорғануға болады.

«Біздің дәрігерлер 24-те 7 бойынша жұмыс істейді, олар туыстарын көрмейді әрі шаршады. Вакциналану арқасында ғана пандемияны жеңетінімізді түсінген жөн. Израильдің мысалынан көруге болады, олар коронавирусқа қарсы екпе алу жөнінде әлемде бірінші орында тұр. Мұнда жұқтыру саны нөлге дейін төмендеген. Мен осындай нәтижелерге біз де жетеміз деп үміттенемін», — деді Лаура Мырзағали.

Журналистердің сұрақтарына жауап бере келіп, Лаура Мырзағали АҚШ-та 12 жастан асқан жасөспірімдерге коронавирустан екпе салудың басталғанын растады. Спикер олардың ведомствосында ресейлік «Спутник-V» вакцинасын жасаушылармен Н. Гамалеи атындағы институттан Александр Гинцбургпен кеңескенін айтты. Ғалымның айтуынша, қазіргі кезде клиникалық сынақтар жүріп жатыр. Сынақтар аяқталған соң оны Ресейде қолдануға болады. Ал Қазақстанда әзірге 18 жастан асқан адамдардың вакциналануына рұқсат етілген.

Л. Мырзағали өзінің сөзін коронавирусқа қарсы келіп түскен вакцинаның саны туралы ақпаратпен қорытындылады. Мәселен, барлық кезең ішінде 9 транш келіп түсті, вакцинаның 302 985 дозасы жеткізілді. Жалпы көлемнің ішінде QazVac вакцинасының бірінші траншы 3 000-ды құрады. Sinopharm вакцинасының 15 000 доза көлеміндегі алғашқы жеткізілімі келіп түсті. Бүгінде қалада мынадай көлемде вакцина бар : I компоненттің 37 417 дозасы, II компоненттің 78 444 дозасы.