Шымкент қаласында жаңа қоғамдық кеңістіктерді дамыту жұмыстары жалғасуда. Кезекті жұмыс сапары барысында қала әкімі Ғабит Сыздықбеков «Тұран-2» шағынауданында орналасқан жаңа саябақтың ашылуына қатысып, тұрғындармен кездесті.
Жалпы аумағы 2,7 гектарды құрайтын демалыс орны демеушілердің қолдауымен салынды. Саябақта жаяу жүргіншілер жолы, веложолақ, субұрқақ, балалар мен спорт алаңшалары, автотұрақ қарастырылған. Сондай-ақ, 1,8 гектар аумаққа көгал төселіп, қылқанжапырақты және жапырақты ағаш көшеттері отырғызылды. Жарық шамдар орнатылып, демалушылардың жайлылығы үшін орындықтар қойылған.
Тұрғындармен әңгіме барысында қала әкімі қоғамдық кеңістіктердің көбеюі инфрақұрылымды дамытудың маңызды бағыты екенін және бұл халықтың өмір сүру сапасын арттыруға оң әсер ететінін атап өтті.
Сапар барысында әкім дендросаябақтағы қайта құру жұмыстарының барысымен де танысты. Бұл жоба әлеуметтік жауапкершілік аясында бизнес өкілдерінің қолдауымен кезең-кезеңімен жүзеге асырылуда. Қазіргі таңда мұнда пандусы бар инклюзивті ойын алаңы, төрт воркаут алаңы, сәндік аркалар, перголалар, балаларға арналған ойын аймақтары және демалуға арналған орындықтар орнатылды. Жоспар толық аяқталған соң, дендросаябақ қала тұрғындары мен қонақтары үшін заманауи демалыс орнына айналмақ.
Сонымен қатар, жұмыс сапары аясында қала басшысы Абай ауданындағы «Алтынтөбе» және «Көкбұлақ» тұрғын алаптарында салынып жатқан жолдардың сапасын тексерді. Әл-Фараби ауданындағы Ә. Молдағұлова көшесі мен «Қарасу» шағынауданындағы көпқабатты үйлердің жылыту маусымына дайындығын бақылап, жауапты сала мамандарына нақты тапсырмалар берді.
Бұл бағыттағы жұмыстар Шымкент қаласының инфрақұрылымын заманауи әрі қолайлы етуге мүмкіндік береді. Қала тұрғындары жаңа саябақтар мен абаттандырылған аумақтарды белсенді пайдаланып, отбасы демалысына, спортпен айналысуға қолайлы жағдайға ие болады. Алдағы уақытта да мұндай жобалар жалғасын тауып, шаһардың көркін арттыра түсетіні күтілуде.
