Шымкент қаласы әкімінің орынбасары Берік Серікұлы Беркімбаевтың төрағалығымен жол қауіпсіздігін қамтамасыз ету мәселелері жөніндегі жұмыс тобының кезекті отырысы өтті. Жиынға құқық қорғау органдары мен аудандық, департамент басшылары, жергілікті атқарушы және үйлестіруші органдардың жауаптылары, сондай-ақ қоғамдық көлік тасымалдау ұйымдарының басшылары қатысты.
Күн тәртібінде қоғамдық көлік тасымалдаушылары тарапынан жол қауіпсіздік ережелерін сақтау мәселелері, қала жол инфрақұрылымының жай-күйі және жол қауіпсіздігін ұйымдастырудағы бейнебақылау жүйелерінің тиімділігін арттыру шаралары қаралды. Сонымен қатар жол қозғалысының қауіпсіздігін қамтамасыз ету, апаттық жағдайлардың алдын алу бойынша нақты ұсыныстар талқыланды.
Шымкент қаласы әкімінің орынбасары жол қауіпсіздігі мәселесінде қоғамдық көлік жүргізушілері тарапынан орын алған бұзушылықтарды қатты сынап, оларды жою бойынша жедел шаралар қабылдауды тапсырды. Бұл шаралар тұрғындардың қауіпсіздігі мен жол қозғалысының реттелуін қамтамасыз ету үшін аса маңызды болып отыр.
Сондай-ақ отырыста жол қауіпсіздігі мәселесінде ведомствоаралық өзара іс-қимылды күшейту, құқық қорғау, білім беру және көлік саласындағы ұйымдардың үйлесімді жұмысын арттыру қажеттігі ерекше аталды. Бірлескен бақылау, ақпарат алмасу және жол ережелерін сақтау бойынша бірізді шараларды жүзеге асыру болашақтағы апаттық жағдайлардың алдын алуға мүмкіндік береді.
Жұмыс тобының талқылаулары нәтижесінде тиісті шешім жобалары пысықталып, оларды іске асыру бойынша ортақ іс-қимыл жоспарын әзірлеуге қол жеткізілді. Жоспар бойынша алдағы уақытта қоғамдық көлікте жол ережелерін сақтау мониторингі күшейтіліп, бейнебақылау жүйелерінің жұмысы оңтайландырылатын болады.
Отырыстың негізгі мақсаты – қала тұрғындары үшін жол қозғалысын қауіпсіз ету, қоғамдық көліктегі тәртіпті қамтамасыз ету және жол инфрақұрылымын жетілдіру болып табылады. Шымкент қаласы әкімдігі бұл бағытта жұмыстарды тұрақты түрде жүргізетінін атап өтті, ал барлық қатысушы тараптар өз міндеттерін жауапкершілікпен орындауға дайын екендерін жеткізді.