Сайрам ауданы, Қарабұлақ ауылында «Ассамблея жастары» РҚБ-нің Түркістан облыстық өкілдігінің ұйымдастыруымен қол күресінен аудан біріншілігі өтті.
Білектілер мен жүректілер додасына ауданға қарасты 11 ауыл округінен 130 оқушы қатысып, өзара күш сынасты.
Аталған жарыста сөз алған Түркістан облыстық қоғамдық даму басқармасы «Қоғамдық келісім» КММ-нің Сайрам аудандық филиалының басшысы Базарбай Айтбаев бұл спорт бәсекесінің аудан көлемінде қол күресі спортына қатысушылардың ауқымын арттырып, салауатты өмір салтын насихаттауда, сондай-ақ өңіріміздегі қоғамдық келісім мен жалпыұлттық бірлікті орнықтыруда маңызы зор екенін атап өтіп, қатысушыларға сәттілік тіледі.
Қол күрес сайысы WAF бекітілген ережесіне сәйкес 45, 65, 85+ салмақ дәрежелерінде ұйымдастырылды.
Сайыс қорытындысында 45 кг салмақта І орынды Нишантаев Умар, ІІ орынды Розиматов Билал, ІІІ орынды Юлдашбеков Абдухалик еншіледі. Ал 65 кг салмақта жүлделі І орынды Абдуманнатов Шахзод жеңіп алды. ІІ орынды Эргашов Элнур, ІІІ орынды Ирисметов Аббос иеленді. 85+ кг салмақта Абдугафуров Абдурофи жеңімпаз атанса, ІІ орынға Сатбалдиев Навруз, ІІІ орынға Давранов Ислам лайық деп танылды.
Жарыс соңында жеңімпаздар арнайы дипломдармен және медальдармен марапатталды.
