«Денсаулық-зор байлық »деген мақал тегін айтылмаған. Адамның басты
байлығы-денсаулық. Денсаулық-адамға табиғаттың берген ең ұлы құндылығы.
Көптеген отбасылар денсаулықтарындағы мәселелер бойынша балалы бола алмай жүр.
Президент Қасым-Жомарт Тоқаевтың тапсырмасы бойынша елімізде жүзеге асырылып жатқан «Аңсаған сәби» әлеуметтік бағдарламасы аясында көптеген отбасы бала сүю бақытына ие болуда. «Аңсаған сәби» бағдарламасы бедеулік диагнозы қойылған пациенттерге арналған.
Осы тапсырманы жүзеге асыру үшін, бедеу ерлі-зайыптыларға қосымша репродуктивті әдістер мен технологияларды тиімді өткізу үшін Денсаулық сақтау Министрлігі атқарылуы тиіс іс- шараларды жүргізуде.
Жалпы, республика бойынша жыл сайын 7000 квота бөлінеді. Ең көп квота Алматы, Астана, Шымкент қалаларына қарастырылған.
Шымкентте бүгінде 4 репродукция орталығы жұмыс істейді. Қалада ЭКҰ-ға дайындық бойынша қалалық перинаталдық орталықтың консультативті-диагностикалық блогы жетекші медициналық ұйым ретінде бекітілген. Онда 2018 жылдан бастап Бедеулік мәселелері жөніндегі кабинет жұмыс істейді.
Түрлі ем шараларға қарамастан бір жыл бойы түрлі факторларға байланысты физиологиялық жүктілік болмаған ерлі-зайыптылар ЭКҰ квотасына қатыса алады.
Биыл мегаполиске бағдарлама шеңберінде 429 квота бөлінген.
Қазіргі таңда қалада бедеулікпен есепте тұрған 600 жұп бар. Жыл басынан бері арнайы орталықтарға 261 жұп ЭКҰ квота арқылы жолданды.
Айта кетейік, 2021 жылы қалаға 403 квота бөлінген болса, соның ішінде жүкті болғандар саны-202. Былтырғы жылы 413 квота бөлінген, соның ішінде жүкті болған саны – 220. Бағдарлама қолға алынған соңғы үш жыл ішінде квота арқылы 136 сәби дүниеге келген.
