Былтыр шымкенттік жас спортшылар екі мыңға жуық медальді қоржынға салды            

Шымкент қаласында жалпы 34 спорттық ұйым жұмыс істейді. Оның 29-ы мемлекеттік меншіктегі спорт мекемесі, 5-еуі мемлекеттік-жекешелік әріптестік аясында жүзеге асқан.

Аталған мекемелерде 18 242 спортшы тіркеліп, 906 жаттықтырушы оқу-жаттығу сабақтарын жүргізуде. Спорттың 74 түрі қамтылады. Соның ішінде 37 олимпиадалық спорт түрі бар. Атап айтқанда ауыр атлетика, бадминтон, баскетбол, бокс, әйелдер боксы, грек-рим күресі, еркін күрес, велоспорт, волейбол, жағажай волейболы, гандбол, гимнастика, байдарка және каноэда есу, дзюдо және тағы да басқа.

Ал мүгедектігі бар адамдарға арналған спорт мектептерінде 18 спорт түрі жолға қойылған. Онда 381 мүмкіндігі шектеулі азамат жаттығуда. Нәтижелер көңіл қуантарлықтай. Былтыр Пекин (Қытай) қаласында өткен ХХIV қысқы Олимпиада ойындарында спортшымыз Шерзод Хаширбаев бақ сынады. Кашиас-ду-Сул қаласында (Бразилия) өткен ХХIV Сурдлимпиада ойындарына еркін күрестен 70 кг. салмақта Рсалы Сабыржан және 65 кг салмақта Пернеш Шадияр қатысты. Рсалы Сабыржан 2 орын, Пернеш Шадияр 5 орынды жеңіп алды.

Шымкенттік спортшылардың жетістіктерін расында мақтанышпен айтуға болады. Айталық, Нормандия қаласында /Франция/ өткен Дүниежүзілік гимназияда ойындарына 11 спорт түрінен 23 спортшымыз қатысып, нәтижесінде 5 алтын, 3 күміс, 2 қола медаль иеленді.

Бирмингем қаласында /АҚШ/ өткен XI Дүниежүзілік ойындарына 3 спортшымыз аттанып, нәтижесінде Берульцева Софья каратэден 1-орынды жеңіп алды. Құзға өрмелеуден Улжабаева Тамара мен каратэден Дархан Асадилов 7-ші орынды иеленді.

Жалпы Қазақстан Республикасының чемпионаттарына қатысқан шымкенттік жас спортшылар 628 алтын, 577 күміс, 619 қола медаль жеңіп алды. Барлығы 1824 медаль.

Ал Азия чемпионаттарында қала спортшылары 89 алтын, 58 күміс және 67 қолаға қол жеткізсе (жалпы 214 медаль), осы уақыт арасында Әлем чемпионаттарында 60 алтын, 38 күміс және 33 қола медальға (жалпы 131 медаль) ие болды.

“Шымкент келбеті”