Кітап – білім бұлағы.
Кітап оқу- қоғамның мәдени деңгейін, талғамын және рухын көтеру. Қазіргі жаһандану кезінде кітапхана қорын электронды нұсқада жинақтап-жүйелеу, сақтау – уақыт талабы. Бірақ қанша жерден электронды кітапханалар қызметі жүйелі болғанымен, дәстүрлі кітапханалар жұмысын алмастыра алмайды. Өйткені кітапты қолыңа алып әрбір бетін парақтап оқу үлкен рухани әсер қалдырады. Кітап оқу адамның ой-өрісін кеңейтеді, сауаттылығын арттырады. Сондықтан еліміздің әр өңірінде кітапханалардың сапасы мен кітап оқитын оқырмандардың санын арттыру қажет. Әсіресе жастар арасында кітап оқу мәдениетін қалыптастыру керек. Ел болашағы -білімді жастардың қолында.
А.Пушкин атындағы қалалық әмбебап кітапханасында «Ел болашағы – кітап оқитын ұлт» атты іс-шара өтті. ҚР Президентінің кеңесшісі Мәлік Отарбаев Шымкент қаласының жас жазушылары, әдебиет сүйер қауымымен жүздесіп, еркін форматта әңгімелесті.
Қазақстан Жазушылар Одағының мүшесі, «Серпер» сыйлығының лауреаты М.Отарбаев қазіргі жаһандану дәуірінде саналы ұрпақ тәрбиелеу, жастарды кітап оқуға ынталандыру, қоғамдық сананы дамыту бағытында өз ойларымен бөлісіп, пікір алмасты.
– Қазіргі бәсекелестік заманында жастардың нақты мақсаты болуы тиіс. Жастар қазір кітаптан алыстап барады. Керісінше, біз кітап оқитын ұлтқа айналуымыз керек. Кітап оқыған жастар, азаматтар өз ұлтын сүйеді. Өмірге деген құштарлығы артады. Интеллектіміз өскенде біздің тұрмысымыз түзеліп, өндірісіміз де дамиды, – деді М.Отарбаев.
Еркін форматта өткен кездесуде Мемлекет басшысының Жолдауы аясындағы міндеттер, оны іске асырудың тетіктері айтылды. Зиялы қауым өкілдері, жас оқырмандар әдебиетті дамыту мәселелері, кітап оқуға қызықтыру, кітапты жарнамалау бойынша өз сауалдарын қойды.
Ntime.kz
