Түркістан облысының сайлаушылары саяси науқанға қатысу жағынан алғашқы үштіктен көрінді. Бұл облыс тұрғындарының елдің болашағына бей-жай қарамайтынының көрінісі әрі бір ай бойы жұмысын жүйелі жүргізген үгіт-насихат тобының еңбегі болды.
Қ.К.Тоқаев Республикалық қоғамдық штабқа келіп, өзіне сенім артқан коалиция мүшелеріне алғысын жаудырды. «Әрбір сайлаушыға өз таңдауын жасауына еркіндік берілді. Халықтың сенімі – бұл ең құнды нәрсе. Сондықтан халықтың сенімін бәріміз ақтауымыз керек!» – деді Қасым-Жомарт Кемелұлы.
Орталық сайлау комиссиясының алдын ала қорытындысы бойынша Халықтық коалиция атынан Президенттікке үміткер Қасым-Жомарт Тоқаев 81,31% дауыс жинап, жеңіске жетті.
Сайлау учаскелеріне қазақстандық бұқаралық ақпарат құралдарының 1225 өкілдері, 23 елден 41 шетелдік БАҚ өкілдерін ұсынатын 106 аккредиттелген журналистер қатысып, сайлау барысын жариялап отырды.
Ел болып басшымызды таңдадық. Енді сенім Президентте. Қазақстанды биік шыңдар мен асуларға жетелеуде Мемлекет басшысына қажырлы қайрат тілейміз.
Бекжігіт СЕРДӘЛІ
Қ.А.Ясауи атындағы ХҚТУ-нің профессоры, журналист, композитор, ғалым
