Көпұлтты мемлекет үшін этносаралық келісім мен қоғамдық татулық – тұрақтылық пен дамудың басты кепілі. Әртүрлі ұлт пен ұлыс өкілдерінің өзара сыйластықта, түсіністік пен ынтымақта өмір сүруі елдің бірлігі мен болашағын айқындайды. Сондықтан этносаралық келісімді сақтау әрбір азаматтың маңызды міндеті болып табылады.
Қазақстан – көптеген этностар мен мәдениеттердің ортақ шаңырағына айналған мемлекет. Елімізде әртүрлі ұлт өкілдері бір мақсат пен бір мүдде жолында еңбек етіп, қоғамның дамуына үлес қосуда. Бұл – өзара құрмет пен достықтың, татулық пен келісімнің нәтижесі.
Этносаралық келісім халықтар арасындағы сенімді нығайтып қана қоймай, елдің әлеуметтік-экономикалық және мәдени дамуына да оң әсер етеді. Бірлігі бекем мемлекетте тұрақтылық сақталып, азаматтардың әл-ауқаты артады. Ал алауыздық пен түсінбеушілік қоғамның дамуын тежеп, ел болашағына қауіп төндіруі мүмкін.
Келісім мен татулықтың негізі – өзге ұлттардың мәдениетін, тілін, дәстүрін құрметтеу. Әр азамат өз халқының құндылықтарын дәріптей отырып, басқа этностардың ерекшеліктеріне де сыйластықпен қарауы қажет. Осындай көзқарас қоғамдағы достық пен бірлікті нығайтады.
Жас ұрпаққа толеранттылық, патриотизм және адамгершілік құндылықтарды сіңіру де ерекше маңызды. Себебі бүгінгі жастар – ертеңгі ел тірегі. Олар ұлтаралық татулық пен қоғамдық келісімді сақтаудың маңызын терең түсінгенде ғана мемлекетіміздің болашағы жарқын болмақ.
5 маусым күні Кентау қаласында этносаралық татулықты насихаттау, қоғамдық келісім мен жалпыұлттық бірлікті нығайту мақсатында «Этносаралық келісім – ел болашағы» атты интеллектуалды ойын ұйымдастырылды.
Іс-шараға Кентау қаласы мен оған қарасты ауылдық округтердің тұрғындарынан құралған командалар қатысып, этносаралық келісім, достық, ынтымақ және ел бірлігі тақырыптары бойынша өз білімдері мен логикалық ойлау қабілеттерін сынады.
Қатысушылар жоғары белсенділік танытып, ұйымшылдықтарын, білім деңгейлері мен тапқырлықтарын көрсетті. Мұндай іс-шаралар қоғамдағы тұрақтылық пен келісімді нығайтуға, түрлі этнос өкілдері арасындағы өзара сыйластық пен достықты дамытуға ықпал етеді.
Іс-шара соңында қатысушыларды Кентау қаласы әкімінің орынбасары Бауыржан Әбенұлы құттықтап, жеңімпаздар мен белсенді қатысушыларды марапаттады. Ол өз сөзінде қоғамдық келісім мен бірліктің ел дамуындағы ерекше маңызын атап өтіп, барлық қатысушыларға алғысын білдірді.
этносаралық келісім – елдің тұрақты дамуы мен өркендеуінің негізгі факторы. Бірлігі жарасқан, татулығы бекем қоғам ғана кез келген қиындықты еңсеріп, биік мақсаттарға жете алады. Сондықтан бейбітшілік пен келісімді сақтау – баршамызға ортақ міндет.