Қызметтік ит Тараз тұрғынынан 5 келіден астам есірткі тапты

«Қарасора-2021» жедел-алдын алу іс-шарасын жүргізу барысында Жамбыл облысының Полиция департаменті  Есірткі қылмысына қарсы іс-қимыл басқармасының қызметкерлері   Тараз қаласының   48 жастағы жергілікті тұрғынын   ұстап,  оның тұрғылықты жерінен   санкцияланған тінту барысында жалпы салмағы 5 келі  150 грамм  «кептірілген марихуана»  есірткі заты табылып, тәркіленді деп хабарлайды Жамбыл облысы ДП баспасөз қызметі. 

Тінту  «Теа» атты қызметтік иттің қатысуымен жүргізілді.

«Аталған дерекке қатысты  Қазақстан Республикасы Қылмыстық кодексінің 296-бабы 4-бөлігі (Аса ірі мөлшерде есірткі заттарын заңсыз сақтау) бойынша сотқа дейінгі тергеу амалдары  басталды. Осы қылмысты жасағаны үшін 3 жылдан 7 жылға дейінгі мерзімге бас бостандығынан айыру жазасы түріндегі қылмыстық жауапкершілік көзделген.

Ұсталған азамат кінәсін мойындады, ол Тараз қаласы  Полиция басқармасының  уақытша ұстау изоляторына қамаққа алынды», — деді Жамбыл облысының  Полиция департаменті  Есірткі қылмысына қарсы іс-қимыл басқармасының  бастығы А.Жұмабеков.