Түркістан қаласында «Turan Mall» ойын-сауық орталығында ерекше балаларға арналған «Армандар орындалады» жобасы 27-ші рет ұйымдастырылды. Бұл ерекше шара балаларға тек көңіл көтеру ғана емес, сонымен қатар, олардың арман-тілектерін орындауға мүмкіндік беретін маңызды бастама ретінде ерекше орын алады. Жобаның мақсаты – мүмкіндігі шектеулі балалардың өмірін жақсартуға ықпал ету, оларға қоғамда елеусіз қалмайтындарын көрсету және олардың армандарын орындау арқылы оларға қуаныш сыйлау.
Жиынға Түркістан қаласының әкімінің орынбасары Мекенхан Қозыханұлы қатысып, балаларды қуантатын ерекше сәтте олардың қасында болды. Қала әкімінің атынан балаларға алғыс хаттар мен сыйлықтар табысталды. Бұл іс-шараның бірегейлігі, оның түркістандық мәдениет пен өнердің көрінісіне айналғандығында. Қалалық мәдениет үйінің өнерпаздары әсем әндер орындап, балалармен бірге би биледі, салтанатты кештің ажарын ашып, қатысушыларға ұмытылмас әсер қалдырды.
Бұл жобаның ең басты ерекшеліктерінің бірі – оның «Сен ерекшесің» атты фотокөрмесі. Осымен екінші рет өткізіліп отырған фотокөрмеде ерекше балалардың жарқын сәттері кәсіби фотограф Самат Мырзалиевтің объективінде тіркелді. Көрмеге қойылған фотосуреттер тек балалардың көңілін көтеріп қана қоймай, олардың қоғамға қажеттілігі мен оларды түсінуге деген ынтызарлықты арттырып, қоғамды мейірімділікке үндейді.
«Армандар орындалады» жобасының авторы Әсел Бимырзаева фотосессиялардың ерекше балалар үшін қаншалықты маңызды екенін атап өтті. Балалардың фотоға түсуі олардың өз-өзіне деген сенімін арттырады, шаттық сыйлайды. Мамандармен бірге балалардың фотосессияға қатысуы – бұл тек фотоға түсіру ғана емес, баланың ішкі әлемін тереңірек түсіну мен онымен ортақ байланыс орнату екендігін айтты. Әсел Бимырзаева бұл жобаның мақсаттарының бірі – мүмкіндігі шектеулі балаларды қоғамнан тысқары қалдырмау, олардың өмірлеріне өзгеріс енгізу арқылы өз армандарын орындауға мүмкіндік беру екендігін жеткізді.
Бұл жоба тек Түркістан қаласында ғана емес, бүкіл өңірде мүмкіндігі шектеулі балаларға деген қамқорлықтың ерекше үлгісін көрсетіп келеді. Жобаның жүзеге асуы балалардың қызығушылығын оятады, оларға өмірде өзгерістер жасауға көмектеседі. Мұндай шаралар балалардың болашағына деген үмітін арттырып, олардың әрбір арманының орындалуына мүмкіндік береді.
Жиын соңында Әсел Бимырзаева бұл жобаның жүйелі түрде жалғасатынын айтып, өз алғысын білдірді. Балаларды қуантуды өзіне өмірлік мақсат еткен Әсел ханымның жақындап келе жатқан жобаларына сәттілік тілегендер көп болды. Ел арасында «қайыр берген қол, бата берген ауыздан артық» деген сөз бар. Міне, бұл сөздің терең мәнін дәл осы жоба көрсетіп отыр. Қамқорлыққа мұқтаж жандардың жанашыры болып, өз жүрек жылуын ұсынып, ізгілік нұрын шашып жүрген жомарт жандардың қатары көбейгенін көргіміз келеді.
«Армандар орындалады» жобасы тек балаларға ғана емес, жалпы қоғамға маңызды үлес қосып келеді. Бұл бастама – бабалар дәстүрінің жалғасы, мейірім мен қамқорлықтың нышаны ретінде әлі де ұзақ уақыт бойы өз жалғасын таба берері сөзсіз.
