Шымкент қаласының әкімі Ғабит Сыздықбеков көшпелі кездесулер аясында Қаратау ауданының тұрғындарымен жүздесті. Алтын Орда, Қайтпас және Таскен шағын аудандарының тұрғындары өздерін толғандырған өзекті мәселелерді ортаға салып, ұсыныстарын жеткізді.
Кездесу барысында жаңа тұрғын үй алаптарында әлеуметтік нысандардың жетіспеушілігі мәселесі көтерілді. Тұрғындар полиция пунктінің, Мәдениет үйінің және мектеп құрылысының қажеттілігін атап өтті. Сонымен қатар, ирригациялық жүйелерді орнату, балалар мен спорт алаңдарын абаттандыру мәселелері де талқыланды.
Жергілікті тұрғындар жолдарды асфальттеу, көшелерді жарықтандыру, азық-түлік жәрмеңкесін ұйымдастыру, автомобиль тұрақтарын салу және қоғамдық көлік жұмысын жақсарту мәселелеріне де назар аударды.
Бұдан бөлек, шағын және орта бизнес нысандарының жұмыс істеуіне, білім беру мекемелерін жөндеуге, көшелерді көгалдандыруға және үй маңындағы аумақтарды абаттандыруға қатысты ұсыныстар да айтылды.
Қала басшысы аудан әкіміне және тиісті басқармалардың басшыларына кездесуде айтылған өтініштерді мұқият қарастыруды тапсырды. Сондай-ақ, күрделі мәселелерді зерделеп, халықпен кері байланыс орнату керектігін ескертті. Бұл кездесу тұрғындардың тікелей сұрақтарына жауап беруге және мәселелерді шешуге бағытталған тиімді диалог алаңы болды.
Кездесу барысында көтерілген мәселелердің шешімі қала тұрғындарының жайлылығын арттыруға, тұрмыс сапасын жақсартуға және ауданның дамуына бағытталған. Қала әкімдігі тұрғындардың ұсыныстары мен тілектерін ескере отырып, жоспарлы жұмыстар жүргізетінін атап өтті. Бұл кездесулердің тұрақты түрде өткізілуі халық пен билік арасындағы байланысты нығайтып, қаланың әрбір тұрғынының мүддесін қорғауға бағытталған. Шымкент қаласының дамуындағы маңызды қадам ретінде әкімнің халықпен кездесуі халық пен билік арасындағы сындарлы қарым-қатынастың үлгісі болып табылады.
