Шымкент қаласының тұрғындары мен қонақтары үшін сүйікті демалыс орнына айналған дендросаябақта тағы бір қуанышты жаңалық болды. Қала әкімдігінің қолдауымен және қалалық жайлы ортаны дамыту басқармасының бастамасымен саябақ аумағында заманауи ойын алаңшалары орнатылды.
Бұл бастама балалардың бос уақытын тиімді өткізуіне және отбасылық демалысты барынша қолайлы етуге бағытталған. Жаңа алаңшаларда әртүрлі жастағы балаларға арналған әткеншектер, сырғанақтар, өрмелеу кешендері және қауіпсіз жабдықтар қойылды. Барлық ойын элементтері халықаралық стандарттарға сай жасалып, балалардың денсаулығы мен қауіпсіздігі толық ескерілді.
Алаңшалардың айналасы абаттандырылып, орындықтар мен қоқыс жәшіктері орнатылды. Жасыл желектерді қорғау мақсатында ойын аймақтарының жанына арнайы төсеніштер төселді. Бұл балалардың ойыны кезінде табиғи жабынға зақым келтірмеуге мүмкіндік береді.
Дендросаябақ бүгінде тек табиғат аясында серуендейтін орын ғана емес, балалар мен ересектерге арналған толыққанды демалыс аймағына айналып келеді. Жаңа алаңшалардың орнатылуы – тұрғындардың игілігі үшін жасалып жатқан абаттандыру жұмыстарының бір бөлігі ғана.
Қала әкімдігі алдағы уақытта да саябақ аумағын жаңғырту жұмыстарын жалғастырып, қосымша демалыс аймақтарын, спорттық алаңшаларды және жайлы инфрақұрылымды дамытуды жоспарлап отыр. Бұл өзгерістер дендросаябақты қаладағы ең көрікті әрі қолайлы демалыс орнына айналдыруға септігін тигізеді.
Саябаққа келуші тұрғындардың бірі Айман Қалибекова бұл жаңалықты қуанышпен қабылдағанын айтты:
«Балаларымыз қауіпсіз әрі заманауи алаңшаларда ойнап жүргеніне қуаныштымыз. Мұнда отбасымызбен жиі келеміз. Енді демалысымыз бұрынғыдан да қызықты әрі мазмұнды өтетін болды», – деді ол.
Жаңа ойын алаңшалары балалар үшін шаттық сыйласа, ата-аналар үшін жайлы әрі қауіпсіз демалыс мүмкіндігін береді. Бұл – қала тұрғындарының өмір сапасын арттыруға бағытталған жүйелі жұмыстың нақты нәтижесі.
