Шымкент қаласында жол-көлік қозғалысының қауіпсіздігін қамтамасыз ету, қаланың тазалығы және экологиялық жағдайын жақсарту мақсатында арнайы коммуналдық мекеме мамандары күнделікті жоспарлы түрде жұмыс атқарады. Сол шаралардың бірі – арнайы техника құралдарымен қала ішілік көшелерді жуу, шаң-тозаңнан тазарту, жаяу жүргіншілер мен көлік қозғалысын қолайлы ету жұмыстары болып табылады.
Қаратау ауданында көше жуу жұмыстары көбінесе түнгі мезгілде таңға таман атқарылады. Бұл шара алдын ала барлық қозғалысқа қатысушылар үшін қолайлы жағдай жасау мақсатында жоспарланған. Өйткені күндізгі уақытта көлік қозғалысы қарқынды болғандықтан, арнайы су құйғыш техникамен жұмыс жүргізу көлік үрдісіне біраз кедергі келтіруі мүмкін. Сондықтан аудан аумағындағы жол көшелері мен қоғамдық орындарын жуу, шаңнан тазалау жұмыстары түнгі уақытқа тұспа-тұс келеді.
Мұндай шаралар қаладағы санитариялық тазалықпен қатар, қоршаған ортаның экологиялық ахуалын жақсартуға, шаң-тозаңның таралуын болдырмауға, жол бетон қабаттарының ұзақ сақталуына ықпал етеді. Қазіргі таңда Қаратау ауданы бойынша көше жуу жұмыстары арнайы бекітілген кесте бойынша жүргізіледі. Әрбір көше белгілі бір мерзімде тазартылып отырады, ал орталық магистральдар мен көлік көп жүретін даңғылдарда апта сайын бірнеше мәрте жұмыс жасалады.
Сонымен қатар, жаз айларында ауа температурасының жоғарылауына байланысты көше қабаттарын сумен шаю жұмыстары қосымша атқарылады. Бұл біріншіден, шаңның көтерілуін болдырмауға жәрдем берсе, екіншіден, асфальт қабаттарының қызып кетпеуіне әсер етеді.
Жалпы алғанда, Қаратау ауданында қаланың көркін арттыру, санитарлық-гигиеналық ахуалын жақсарту, қоршаған ортаның тазалығын сақтау мақсатындағы бұл жоспарлы іс-шаралар тұрақты түрде атқарылып, жүйелі түрде жалғасатын болады.
