Қазіргі қоғамда жастар тәрбиесі, отбасы құндылықтарын сақтау және әлеуметтік кеселдердің алдын алу мәселелері ерекше маңызға ие болып отыр. Осы бағытта Қазақстан халқы Ассамблеясы жанындағы Аналар кеңесі жүзеге асырып отырған «Салауатты сана» жобасы – қоғамның рухани және әлеуметтік дамуына бағытталған маңызды бастамалардың бірі.
«Салауатты сана» жобасының негізгі мақсаты – жастар арасында салауатты өмір салтын қалыптастыру, ұлттық құндылықтарды дәріптеу және қоғамдағы келеңсіз құбылыстардың алдын алу. Жоба аясында нашақорлықпен күрес, құмар ойынға тәуелділіктің алдын алу, тұрмыстық зорлық-зомбылыққа қарсы мәдениет қалыптастыру, вандализмге жол бермеу және ысырапшылдық пен немқұрайдылыққа қарсы тәрбиелік жұмыстар жүргізілуде. ()
Түркістан облыстық Қазақстан халқы Ассамблеясы жанындағы Аналар кеңесі бұл жобаны өңірде белсенді түрде жүзеге асырып келеді. Аналар кеңесінің ұйымдастыруымен жастармен кездесулер, пікір алмасу алаңдары, дөңгелек үстелдер және тәрбиелік іс-шаралар тұрақты өткізіліп келеді. Осындай кездесулердің басты мақсаты – жас ұрпақтың бойына адамгершілік қасиеттерді сіңіріп, оларды қоғам алдындағы жауапкершілікті сезінетін азамат ретінде тәрбиелеу.
Осы тұста Түлкібас ауданында Түркістан облыстық ҚХА жанындағы Аналар кеңесінің «Салауатты сана» жобасы аясындағы көшпелі отырысы ұйымдастырылды.
Кездесуде нашақорлық, лудомания, тұрмыстық зорлық-зомбылықтың алдын алу, отбасы құндылықтарын нығайту және жастар тәрбиесі мәселелері талқыланды.
Жиында Аналар кеңесінің төрайымы Гүлсара Тоққұлова жобалардың жүзеге асырылуы бойынша баяндама жасаса, Медиация кеңесінің төрағасы Бақытжан Бейсембаев қоғамдық келісім мен заңның маңыздылығына тоқталды.
Шара барысында полиция өкілдері түсіндіру жұмыстарын жүргізіп, тұрғындармен пікір алмасты.
Қоғамның тұрақты дамуы ең алдымен отбасы тәрбиесінен басталады. Сондықтан Аналар кеңесі отбасы институтын нығайтуға, ата-ана жауапкершілігін арттыруға және ұлттық тәрбие құндылықтарын кеңінен насихаттауға басымдық береді. Ана тәрбиесі арқылы ұлттың болашағы қалыптасады. Осы тұрғыдан алғанда, Аналар кеңесінің атқарып отырған жұмысы қоғамдағы бірлік пен татулықты нығайтуға, жастардың рухани дүниесін байытуға үлкен үлес қосып келеді.
Қорыта айтқанда, «Салауатты сана» жобасы – бүгінгі күннің өзекті мәселелерін шешуге бағытталған маңызды қоғамдық бастама. Әрбір ата-ана, ұстаз және қоғам мүшесі жастардың жарқын болашағы үшін жауапты екенін сезініп, осындай игі бастамаларды қолдауы қажет. Өйткені саналы ұрпақ – қуатты мемлекеттің берік негізі.