А.С.Пушкин атындағы әмбебап кітапханасында «Адам саудасы және оның алдын алу» тақырыбында семинар-тренинг өтті. Мақсаты — адам саудасының алдын алу, аталған қылмысқа қарсы күресті күшейту және азаматтардың құқықтық сауаттылығын арттыру.
Семинар-тренингті М.Әуезов атындағы ОҚУ Заң факультеті Халықаралық қатынастар және халықаралық құқық кафедрасының меңгерушісі, PhD доктор Бекбосынов Ермек Төленұлы жүргізді.
Адам саудасы мәселесі қазіргі өркениетті қоғамда да әлемнің басты проблемаларының бірі болып тұр. Бейресми деректерге сәйкес, әлемдегі үшінші ірі заңсыз бизнес түріне адам саудасы жатады. Болжам бойынша оның жылдық тауар айналымы 10-15 млрд. АҚШ долларын құрайды. Бұл болжам ғана. Өйткені нақты мәліметке қол жеткізу әзірге мүмкін емес. БҰҰ мәліметінше жаһандық адам саудасының көпшілігі Балқан түбегінде, ТМД елдерінде, Оңтүстік Америка құрлығында, Орталық Еуропада, Африкада, Шығыс Азияда орын алады екен. Әлемдегі адам саудасы құрбандарының 70 пайыздан астамын нәзік жандылар, яғни әйелдер мен қыздар құрайды. Ал жалпы құрбандардың үштен бірі балаларға қатысты екен.
Семинар-тренингке мемлекеттік мекеме қызметкерлері,зиялы қауым өкілдері, саясаттанушылар, азаматтық қоғам өкілдері, әлеуметтік желі белсенділері және жоғары оқу орындарының жастары қатысты. Олар тақырып аясында ақпарат алмасып, өз ой пікірлерімен бөлісті.
Айта кету керек, Шымкентте адам саудасының алдын алу бойынша іс-шаралар науқаны бастау алды. Басты мақсат — адам саудасының алдын алу, аталған қылмысқа қарсы күресті күшейту және азаматтардың құқықтық сауаттылығын арттыру.
Адам саудасы бұл ауыр қылмыс және адам құқығын өрескел бұзу болып табылады. Жыл сайын мыңдаған ерлер, әйелдер мен балалар үйде де, шетелде де адам саудасымен айналысушылардың қолынан зардап шегеді. Бұл біз өмір сүріп отырған қоғамдағы жасырын тұрған қылмыс. Күн сайын жүздеген адамдармен кездесетін көшеде ақша сұрайтын балалар мен ересектер осындай сауданың құрбаны болуы мүмкін. Бірақ олар көмек алу үшін қайда шағымданатынын білмейді. Әлемнің барлық елдері адам саудасынан зардап шегеді және бұл қылмыстың құрбаны болуы әбден мүмкін.Шымкентте бастау алған бұл жоба биыл қазан-қараша айларын қамтиды. Қала көшелеріне адам саудасы туралы ақпарт жазылған арнайы билбордтар ілініп, тұрғындарға буклеттер, парақшалар, футболкалар мен кепкалар таратылады. Адамдар осындай ақпараттар арқылы не істеу қажет екенін ескереді.
Егер сіз адам саудасы фактілермен кездескен жағдайда 102 сенім нөміріне хабарласуыңызға болады.
Ntime.kz
