Түркістан қаласында электр энергиясының тапшылығы ауыл шаруашылығы, өнеркәсіп және басқа да салалардың дамуына айтарлықтай әсер етуде. Бұл мәселені шешу үшін Түркістан қалалық орталықтандырылған кітапханалар жүйесінің қызметкерлері Мемлекет басшысы Қасым-Жомарт Тоқаевтың «Әділетті Қазақстан: құқық тәртібі, экономикалық өрлеу, қоғамдық оптимизм» атты Қазақстан халқына жолдауын талқылады. Кітапханашылар мен оқырмандар жолдауда атап өтілген атом электр станциясы (АЭС) құрылысының маңыздылығын және оның еліміздің энергетикалық қауіпсіздігін қамтамасыз етуге ықпалын ерекше атап өтті.
Жиынға Түркістан қаласы әкімдігінің Мәдениет, тілдерді дамыту, дене шынықтыру және спорт бөлімінің басшысы Қадырболат Мұсағалиев, Яссауитанушы Зікірия Жандарбек, кітапхана директоры Гүлзада Жұмағұлқызы, оқырмандар мен кітапханашылар қатысып, өз ойларын ортаға салды. Кездесуде сөз алғандар электр энергиясының тапшылығының өңірдегі әлеуметтік-экономикалық дамуға тигізетін әсері мен оның салдарлары туралы пікірлерін білдірді. Электр энергиясының жетіспеушілігі тек тұрмыстық деңгейде ғана емес, сонымен қатар ірі өнеркәсіптік нысандар мен бизнес субъектілерінің жұмысын да қиындатуда.
Кітапхана қызметкерлері электр энергиясының тапшылығын Ресейден жеткізу арқылы жоюдың болашағына алаңдаушылық білдірді. Былтырғы жылы Қазақстан шамамен 100 миллиард теңге шығын көтерді, ал бұл сома алдағы уақытта арта түсуі мүмкін. Тіпті, еліміздің оңтүстік өңірлерінде электр энергиясының тапшылығы 3,1 млрд кВт/сағ-қа жетіп, бұл көрсеткіш халықтың күнделікті өміріне кері әсер етуде. Яғни, орташа есеппен 100 мың тұрғыны бар қала жылына 700 млн кВт/сағ электр энергиясын тұтынады, бұл тек үй шаруашылықтарының тұтынуы ғана, ал бизнес пен өнеркәсіптік кәсіпорындардың энергиялық қажеттіліктері бұл көрсеткішке қосылатынын ескерсек, мәселе одан әрі ушығып отыр.
АЭС құрылысының маңыздылығы осы контексте ерекше мәнге ие. Кітапханашылар, сондай-ақ, АЭС-тің экологиялық қауіпсіздік тұрғысынан да тиімділігіне тоқталды. Олардың пікірінше, атом электр станциялары экологиялық таза әрі жаңартылатын энергия көздеріне қарағанда қуаттылығы жоғары, сонымен қатар отандық өндірісті дамытуға мүмкіндік береді. АЭС-тің құрылысымен байланысты инвестициялар ел экономикасына оң әсерін тигізіп, жаңа жұмыс орындарын ашуға септігін тигізеді.
Жиын барысында АЭС құрылысын қолдау тек энергия тапшылығын жоюдың ғана жолы емес, сонымен қатар еліміздің энергетикалық қауіпсіздігін нығайту мен экономикалық өрлеуді қамтамасыз етуге бағытталған маңызды қадам екендігі де айтылды. Кітапханашылар мен зиялы қауым өкілдері мемлекеттің стратегиялық бастамаларын қолдай отырып, ел азаматтарының жауапкершілігін арттыру қажеттігін де атап өтті.
Түркістандық кітапханашылардың АЭС құрылысына қолдау білдіруі – бұл тек қоғамдық пікір емес, сонымен қатар энергетикалық қауіпсіздік мәселесіне қатысты азаматтық жауапкершілікті білдіреді. Осылайша, Түркістан өңірі тұрғындары мен мәдениет қызметкерлері еліміздің болашағы үшін маңызды шешімдерді талқылап, сол жолда өз үлестерін қосуға дайын екенін көрсетіп отыр.
