Шымкент қаласында «Таза Қазақстан» республикалық бағдарламасы аясында ауқымды тазалық шаралары өтті. Оған қала тұрғындары белсенді түрде қатысып, табиғатқа деген жанашырлығын, туған жерге деген сүйіспеншілігін паш етті.
Жалпы, Шымкент қаласында «Таза Қазақстан» экологиялық бағдарламасы жалпыхалықтық сипат алып келеді. Бұл жолы да барлық аудандар, мекемелер мен ұйымдар белсене қатысып, тазалық шаралар жоғары деңгейде өтті. Атап айтқанда, қаладағы Абай, Әл-Фараби, Еңбекші, Қаратау және Тұран аудандарында сенбіліктер ұйымдастырылып, орталық көшелер мен аулалар тазартылып, ағаштар әктеліп, көпқабатты үйлердің аумағы ретке келтірілді. Тазалықпен қатар ағаш отырғызу, гүлзарларды күтіп-баптау жұмыстары да жүргізілді. Қала әкімдігі бұл шараны тек бір реттік науқан емес, тұрақты экологиялық мәдениетке айналдыруды көздеп отыр.
«Таза Қазақстан» бағдарламсының шеңберінде, әсіресе, «Таза аула» атты арнайы тазалық шарасы қарқын алып, әр ауданның тұрғындары, еріктілер, жастар мен қоғамдық ұйым өкілдері бірлесіп, өз аулалары мен көшелерін тазалап, ретке келтіруге атсалысты.
Мәселен Қаратау ауданы аумағында да тұрғындар мен жастар ұйымдарының қатысуымен аулалар мен көшелер тазартылды. «Ағаштарды қырқу, аулаларды тазарту сынды жұмыстар жүйелі түрде ұйымдастырылды. Мұндай акциялар тек экологияны жақсартуға емес, қоғамдағы бірлікті нығайтуға да әсер етеді», — деп атап өтті «Қаратау» КММ бөлім басшысы Асан Акбанов.
«Президент Қасым-Жомарт Тоқаевтың елді ұйыстыратын, қоғамды оң өзгеріске бағыттайтын осындай бастамалары халыққа үлкен шабыт береді. «Таза Қазақстан» акциясы ұлттың ішкі мәдениетін көтеретін, рухты оятатын, болашаққа сеніммен қарауға жол ашып келеді».
Мұндай ауқымды бағдарлама ұлттың сана тазалығы, экологиялық мәдениеті, бірлік пен бейбітшіліктің көрінісіне айналып жатқаны сөзсіз. Шымкент қаласында өткен тазалық шаралары осындай бірліктің, жауапкершіліктің, патриотизмнің нақты дәлелі болып отыр. Бірліктің, тазалықтың, патриотизмнің айқын үлгісіне айналған бұл игі іс алдағы уақытта да жалғасын тауып, әрбір шымкенттіктің ортақ борышына айналары анық.
«Таза Қазақстан» бағдарламасы аясындағы тазалық акциясы – табиғатты қорғау мен экологиялық жауапкершілікті арттыруға бағытталған маңызды бастама. Шымкент қаласы бұл шараны жоғары деңгейде ұйымдастырып, тұрғындардың белсенділігін көрсетті.
