Арыс қаласы мен оның айналасындағы ауылдық елді мекендерде балалар үшін қауіпсіз және сапалы ойын алаңшаларын салу жұмыстары қарқынды жүргізілуде. Бұл бастама жергілікті билік пен тұрғындардың бірлескен ұмтылысының нәтижесінде іске асуда және балалардың бос уақытын тиімді әрі қызықты өткізуіне жағдай жасауға бағытталған.
Осыған байланысты қала әкімі Қайсар Маңқараевтың тапсырмасына сәйкес, биылғы жылы Арыс қаласында 17 жаңа балалар ойын алаңшасын орнату жұмыстары қолға алынды.
Аталған нысандардың 10-ы қала аумағында орналасса, қалған 7 ойын алаңшасы ауылдық елді мекендерде бой көтеруде. Барлық алаңшалар заманауи талаптарға сай, балалардың қауіпсіздігі мен белсенді дамуына лайықталған.
Биыл қаладағы Сүлейменов көшесінде орналасқан футбол алаңшасына, сондай-ақ Монтайтас пен Жиделі ауылдық округтеріндегі футбол алаңшаларына жөндеу жұмыстары жүргізіліп жатыр.
Ойын алаңшалары — балалардың денсаулығы мен психологиялық дамуы үшін өте маңызды. Қазіргі заманда балаларды сыртта ойын ойнауға ынталандыру, олардың әлеуметтік қарым-қатынасын дамыту, сондай-ақ отбасылардың демалуына жағдай жасау мақсатында қала және ауылдық жерлерде ойын алаңшаларын жаңарту және жаңа нысандарды салу жұмыстары басталды.
Бұл жұмыстар Арыс қаласының балалар мен жасөспірімдеріне қолайлы орта қалыптастыру, салауатты өмір салтын насихаттау және бос уақытын тиімді өткізуге мүмкіндік беру мақсатында жүзеге асырылуда.
Арыстықтар жаңа ойын алаңшаларының ашылуын құптап отыр. Олар балаларының қауіпсіз ортасында ойнап, белсенді демалуына мүмкіндік беретін осындай жобалардың жүзеге асырылуын қолдайды. Бұл бастама ауыл мен қаланың көркін арттырып, қоғамдық өмірді жандандырады.
Балалар ойын алаңшаларының құрылуы – Арыстағы әлеуметтік дамудың маңызды көрсеткіші. Бұл жобалар балалардың салауатты өсуіне, отбасылық құндылықтардың нығаюына және елді мекендердің жайлы әрі қауіпсіз ортасына ықпал етеді. Алдағы уақытта да мұндай бастамалар жалғасын тауып, Арыс өңірі балғын ұрпақ үшін мейірімді әрі ашық мекенге айналмақ.
