Қала тазалығы – көрікті шаһардың айнасы. Осы бағытта Шымкент қаласында коммуналдық салаға жаңа дем беретін нақты қадам жасалды. Қалалық жайлы ортаны дамыту басқармасына қарасты жауапты мердігер мекеме – «Жасыл-Жер Шымкент» ЖШС автобазасы заманауи электрлі және шаңсорғыш техникалармен толықтырылды.
Бұл – экологиялық тұрғыдан таза әрі үнемді техниканы пайдалану арқылы қала тазалығын жаңа деңгейге көтеруге бағытталған маңызды бастама. Электр қуатымен жұмыс істейтін бұл көліктер қоршаған ортаға зиянды қалдық шығармайды және шу деңгейін де айтарлықтай төмендетеді.
Жаңа техникалардың қатарында көшелер мен тротуарларды тазалауға арналған вакуумды шаңсорғыштар, тротуар сыпыратын шағын көліктер және су бүріккіш машиналар бар. Барлығы да заманауи стандарттарға сай жасақталған.
Мамандардың айтуынша, бұл техника ауа райына тәуелсіз, яғни жазда шаң басқан көшелерді жуып, қыста қар мен мұздан тазарту жұмыстарын тиімді атқара алады. Сонымен қатар, энергия үнемдеуші жүйелер жұмысшылардың еңбегін жеңілдетіп, уақытты айтарлықтай үнемдейді.
«Қала тазалығы – тек көрініс емес, тұрғындардың денсаулығы мен өмір сапасына тікелей әсер ететін фактор. Сол себепті техника паркін жаңарту – біздің басты міндеттеріміздің бірі. Жаңа машиналар экологиялық таза әрі өнімділігі жоғары. Бұл – Шымкенттің жасыл әрі таза қала болуына қосылған үлес», – дейді коммуналдық мекеме өкілдері.
Тазалық қызметкерлері де жаңа техниканың келуі жұмыс сапасын арттыратынын айтады.
«Бұрын бір көшені тазалауға бірнеше сағат кететін. Енді жаңа шаңсорғыш машиналар сол жұмысты бірнеше есе жылдам орындайды. Ең бастысы – тыныс алу жеңіл, ауа таза», – дейді тәжірибелі қызметкер Мақсат есімді азамат.
Қала тұрғындары да бұл жаңашылдықты қуанышпен қабылдауда. Себебі экологиялық тұрғыдан қауіпсіз техникалар қоршаған ортаны қорғап қана қоймай, энергияны үнемдейді және қаланың тазалығын тұрақты ұстап тұруға мүмкіндік береді.
Қалалық әкімдік пен жауапты мекемелер алдағы уақытта коммуналдық салада осындай экологиялық бастамаларды кеңейтіп, «жасыл технологияларды» жүйелі түрде енгізуді жоспарлап отыр.
Шымкент – заманауи, таза әрі жайлы қала болуға қадам басып келеді.
Ал жаңа электрлі техника – сол мақсатқа жетудің сенімді кепілі.
